शिक्षा मन्त्रालयद्वारा गुरुगुरुमालाई पुनः वार्तामा बोलाइयो

द नेप्लिज संवाददाता

१२ वैशाख २०८२, शुक्रबार

विराटनगर– शिक्षा, विज्ञान तथा प्रविधि मन्त्रालयले आन्दोलनरत शिक्षक महासंघलाई पुनः वार्तामा बोलाएको छ । मन्त्रालयका सहसचिव युवराज पौडेलले विज्ञप्ति जारी गर्दै शिक्षक महासंघलाई शनिबार बिहान साढे सात बजे वार्तामा उपस्थित हुन आह्वान गरेका छन् । यसअघि शिक्षामन्त्री रघुजी पन्तले बोलाएको वार्ता शिक्षक महासंघको असन्तुष्टिका कारण असफल भएको थियो ।

विज्ञप्तिमा भनिएको छ, ‘वार्ता र संवादका माध्यमबाट आन्दोलनरत शिक्षकका समस्याहरूको समाधान गर्न नेपाल सरकार, शिक्षा, विज्ञान तथा प्रविधि मन्त्रालयका माननीय मन्त्रीज्यूबाट आह्वान भएबमोजिम मिति २०८२।१।१२ गतेका दिन नेपाल शिक्षक महासंघ, राष्ट्रिय समितिलाई पत्राचार गरिएको थियो । कारणवश, आजका लागि निर्धारित भेटघाट र छलफल हुन नसकेको व्यहोरा सम्बन्धित सबैको जानकारीका लागि अनुरोध छ ।’

शनिबारको बैठक शिक्षामन्त्रीकै उपस्थितिमा हुने बताइएको छ । सर्वोच्च अदालतबाट मिति २०८२।१।१२ मा प्राप्त आदेशको आधारमा महासंघसँग भएको छलफल र परामर्शबमोजिम मन्त्रालयले वार्तामा बोलाएको हो । विज्ञप्तिमा थप भनिएको छ, ‘माननीय मन्त्रीज्यूको उपस्थितिमा मिति २०८२।१।१३ गते बिहान ७ः३० बजे शिक्षा, विज्ञान तथा प्रविधि मन्त्रालयमा हुने वार्ता र संवादको लागि महासंघका अध्यक्ष एवं अन्य पदाधिकारीहरूलाई उपस्थित हुन मन्त्रालयले हार्दिक आह्वान गर्दछ ।’

प्रकाशित : १२ वैशाख २०८२, शुक्रबार 19:53