मौसम बदली, चार प्रदेशका पहाडी क्षेत्रमा वर्षा र हिमपातको सम्भावना

द नेप्लिज संवाददाता

१७ वैशाख २०८२, बुधबार

काठमाडौँ– देशका अधिकांश पहाडी क्षेत्रमा बुधबार आंशिकदेखि सामान्य बदली रहने मौसम पूर्वानुमान महाशाखाले जनाएको छ। अन्य भूभागहरूमा आंशिक बदलीको अवस्था रहनेछ।

महाशाखाका अनुसार कोशी, बागमती, गण्डकी र कर्णाली प्रदेशका हिमाली क्षेत्रमा थोरै स्थानहरूमा हल्का वर्षा वा हिमपातको सम्भावना रहेको छ। त्यस्तै, देशका पहाडी भूभागका थोरै स्थानहरूमा तथा बाँकी भूभागका एक-दुई स्थानमा मेघगर्जन र चट्याङसहित हल्कादेखि मध्यम खालको वर्षा हुन सक्ने सम्भावना छ।

लुम्बिनी प्रदेशका तराई क्षेत्रका केही भागमा हावाहुरी चल्ने चेतावनी समेत दिइएको छ।

बुधबार रातिसमेत देशभर आंशिकदेखि सामान्य बदली रहनेछ। कोशी, बागमती, र गण्डकी प्रदेशका पहाडी क्षेत्रका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशका पहाडी भागका एक-दुई स्थानमा मेघगर्जन र चट्याङसहित वर्षा हुने सम्भावना महाशाखाले जनाएको छ।

कोशी, बागमती र गण्डकीका हिमाली क्षेत्रमा एक-दुई स्थानमा हल्का वर्षा वा हिमपात हुन सक्ने सम्भावनासमेत रहेको पूर्वानुमान गरिएको छ।

प्रकाशित : १७ वैशाख २०८२, बुधबार 05:51