कुलमानको बर्खास्तीपछि विद्युत् प्राधिकरणको सुरक्षा कडा

द नेप्लिज संवाददाता

१२ चैत २०८१, मङ्गलबार

काठमाडौं– नेपाल विद्युत् प्राधिकरणका कार्यकारी प्रमुख कुलमान घिसिङलाई पदमुक्त गरिएको विरोधमा देशभर प्रदर्शन चर्किंदै गएपछि प्राधिकरणको सुरक्षा व्यवस्था थप कडा पारिएको छ ।

सरकारले घिसिङलाई पदमुक्त गर्ने निर्णय गरेपछि विभिन्न स्थानमा प्रदर्शन भइरहेको छ । सम्भावित जोखिमलाई मध्यनजर गर्दै नेपाल प्रहरी र सशस्त्र प्रहरीले विद्युत् प्राधिकरणको केन्द्रीय कार्यालय, क्षेत्रीय कार्यालयहरू तथा अन्य प्रमुख स्थानमा सुरक्षा सतर्कता बढाएको छ ।

घिसिङको बर्खास्तीप्रति राजनीतिक दलहरू, विद्यार्थी संगठनहरू र सर्वसाधारणले चर्को असन्तोष व्यक्त गरिरहेका छन् । विपक्षी दलहरू, नागरिक अभियन्ता र सामाजिक सञ्जाल प्रयोगकर्ताहरूले सरकारको निर्णयको कडा आलोचना गरेका छन् ।

आज बिहान नेकपा (एकीकृत समाजवादी) निकट अनेरास्ववियूले काठमाडौंको प्रदर्शनीमार्गस्थित विश्वभाषा क्याम्पस अगाडि प्रदर्शन गर्दै ऊर्जामन्त्री दीपक खड्काको पुत्ला जलाएका थिए । प्रदर्शनका क्रममा विद्यार्थीहरूले सरकारविरुद्ध नाराबाजी गर्दै घिसिङलाई पुनः नियुक्त गर्न माग गरेका थिए । विशेषगरी घिसिङको नेतृत्वमा नेपाल विद्युत् प्राधिकरणले लोडसेडिङ अन्त्य गर्दै ऊर्जा व्यवस्थापनमा ऐतिहासिक सुधार गरेको भन्दै उनको बर्खास्तीप्रति चौतर्फी असन्तोष देखिएको छ ।

प्रकाशित : १२ चैत २०८१, मङ्गलबार 13:24