राष्ट्रपति पौडेलको बुद्धजयन्ती सन्देश

द नेप्लिज संवाददाता

२९ वैशाख २०८२, सोमबार

विराटनगर — राष्ट्रपति रामचन्द्र पौडेलले शान्तिका प्रतीक महामानव गौतमबुद्धको जन्मभूमि नेपाल हुनु सम्पूर्ण नेपालीका लागि गौरवको विषय भएको बताएका छन्।

२५६९औँ बुद्धजयन्तीका अवसरमा शुभकामना सन्देश जारी गर्दै राष्ट्रपति पौडेलले बुद्धको जीवन, उपदेश र मार्गदर्शनको स्मरण गर्दै धार्मिक, सामाजिक र सांस्कृतिक विविधताबीच सहिष्णुता र सद्भाव कायम गर्दै राष्ट्रिय एकता सुदृढ बनाउन सकिने विश्वास व्यक्त गरेका छन्।

वैशाख शुक्लपक्षको पूर्णिमा तिथिका दिन बुद्धको जन्म, ज्ञान प्राप्ति र महापरिनिर्वाण एकैदिन परेकाले आजको दिनलाई बौद्ध धर्मावलम्बीहरूले श्रद्धा एवं भक्तिभावसहित बुद्धजयन्तीका रूपमा मनाउने परम्परा छ।देशभरका गुम्बा, विहार, मठ, स्तूपा र चैत्यहरूमा विशेष पूजा–अर्चना, प्रार्थना, ध्यान तथा प्रवचनजस्ता कार्यक्रमहरू आयोजना हुँदैछन्।राष्ट्रपतिले शान्तिका दूत बुद्धको शिक्षाले व्यक्तिको आत्मिक उन्नतिसँगै समाजमा स्थायी शान्ति र समृद्धि ल्याउन मद्दत गर्ने विश्वास पनि व्यक्त गरेका छन्।

#बुद्धजयन्ती

प्रकाशित : २९ वैशाख २०८२, सोमबार 08:40