सुराकीलाई ५ करोड पुरस्कार !

द नेप्लिज संवाददाता

६ चैत २०८१, बुधबार

काठमाडौं — बरामद २५ करोडभन्दा बढी विदेशी मुद्राको सूचना दिनेलाई नेपाल प्रहरीले पुरस्कार स्वरुप ५ करोड रुपैयाँ प्रदान गर्ने भएको छ ।

केन्द्रीय प्रहरीका अनुसार विदेशी विनिमय (नियमित गर्ने) ऐन, २०१९ अनुसार सुराक दिनेलाई बरामद रकमको २० प्रतिशत इनाम दिने प्रावधान छ । यस आधारमा सुराकीले करिब ५ करोडभन्दा बढी रुपैयाँ पुरस्कार पाउनेछन् ।

सुराक दिनेको विवरण गोप्य राख्नुपर्ने कानुनी व्यवस्था छ । यो पुरस्कार रकम मुद्दा फैसला भए पछि मात्र निकासा हुन्छ । यो पुरस्कार रकममा कानुन अनुसार कर पनि लाग्छ ।

विदेशी मुद्रा २५ करोड १ लाख ६० हजार ३३८ रुपैयाँ सहित प्रहरीले सिन्धुपाल्चोकको भोटेकोशी–१ बस्ने ४३ वर्षीय फुच्चे भन्ने कुसाङ लामालाई पक्राउ गरेको हो । रसुवा नाका हुँदै ट्रकमा युरो र अमेरिकन डलरसहितका विदेशी मुद्रा लग्दै गरेको सूचनाका आधारमा काठमाडौँ उपत्यका अपराध अनुसन्धान कार्यालयको टोलीले उनलाई सोमबार मध्यराति नियन्त्रणमा लिएको हो ।

प्रहरीका अनुसार उनले काठमाडौंको टोखा–२ झोरबाट ना७ख १६५२ नम्बरको ट्रकमा फल्स बटमभित्र उक्त रकम लुकाएर चिनीया नाका केरुङतर्फ लग्दै गरेको अवस्थामा बरामद भएको हो ।

पक्राउ परेका कुसाङ लामा ट्रक चालकसँगै भरिया मात्रै भएको र उक्त रकमको असली कारोबारी अर्थात् धनीको बारेमा अनुसन्धान भइरहेको प्रहरीले जनाएको छ ।

उपत्यका अपराध अनुसन्धान कार्यालयका प्रहरी निरीक्षक अनिल घिमिरे नेतृत्वको टोलीले उक्त ट्रकलाई नियन्त्रणमा लिएको थियो । हाल कुसाङ लामाविरुद्ध राजस्व अनुसन्धान विभागले अनुसन्धान थालेको छ।

प्रकाशित : ६ चैत २०८१, बुधबार 17:02