कुलमान घिसिङको बर्खास्तगीविरुद्ध राप्रपा माइतीघरमा

द नेप्लिज संवाददाता

१४ चैत २०८१, बिहीबार

काठमाडौं – कुलमान घिसिङलाई सरकारले विद्युत प्राधिकरणका कार्यकारी निर्देशक पदबाट बर्खास्त गरेको विरोधमा राष्ट्रिय प्रजातन्त्र पार्टी (राप्रपा) का कार्यकर्ताहरुले माइतीघर मण्डलामा बिहीबार प्रदर्शन गरेका छन् ।

प्रदर्शनमा सहभागीहरुले ‘लोडसेडिङ चाहिँदैन, कुलमान हटाउन पाईँदैन,’ ‘कुलमान घिसिङ, हामी तिम्रो साथमा छौं,’ र ‘मन्त्रिपरिषद्को निरंकुश र भ्रष्ट निर्णय खारेज गर,’ लगायतका नारा लगाउँदै सरकारको निर्णयको कडा विरोध गरेका थिए ।
प्रदर्शनकारीहरुले कुलमान घिसिङको कार्यकालको अवधीलाई प्रभावकारी र सकारात्मक भएको भन्दै उनलाई हटाउनु भनेको देशको ऊर्जा क्षेत्रमा फेरि अराजकता ल्याउने खतरा रहेको बताएका छन् । राप्रपाले उक्त विरोध प्रदर्शनको माध्यमबाट सरकारलाई जनताको आवश्यकता र मागलाई बुझ्न आग्रह गर्दै व्यवस्थामा सुधारको माग पनि उठाएको छ ।

पार्टीका नेता र कार्यकर्ताहरुले सरकारले जनतालाई उज्यालो र स्थिर विद्युत आपूर्ति दिनुपर्ने र भ्रष्ट निर्णयको खारेज गर्नुपर्ने माग गरेका छन् । राप्रपाको यो विरोध प्रदर्शनले सिंगो देशमा ऊर्जा संकट र सरकारको निर्णयप्रति गम्भीर चिन्ता उत्पन्न गरेको छ ।

प्रकाशित : १४ चैत २०८१, बिहीबार 13:50