सर्वोच्चले शाक्यलाई रिट सच्याउने अवसर दियो, घिसिङको रिट पनि दर्ता

द नेप्लिज संवाददाता

१४ चैत २०८१, बिहीबार

काठमाडौँ — नेपाल विद्युत् प्राधिकरणका नवनियुक्त कार्यकारी निर्देशक हितेन्द्रदेव शाक्यलाई सर्वोच्च अदालतले पुरानो रिट सच्याउन अवसर दिएको छ । उनले आफ्नो ३ वर्ष पुरानो मुद्दाको समाधानका लागि बुधबार सर्वोच्च अदालतमा रिट दायर गरेका थिए । सर्वोच्च प्रशासनले रिटमा प्रक्रिया पूरा नगरेको भन्दै यसलाई सच्याउन समय दिएको हो ।

सर्वोच्चका रजिस्ट्रार भद्रकाली पोखरेलले शाक्यका कानुनी प्रतिनिधिहरूसँग छलफल गरेपछि रिट सच्याउने निर्णय गरिएको थियो । स्रोतका अनुसार शाक्य पक्षले रिट सच्याएर आजै पेस गर्ने तयारी गरेको छ ।

शाक्यको रिटको विषय भने २०७७ मा आफूलाई प्राधिकरणको कार्यकारी निर्देशकबाट ऊर्जा आयोगमा सरुवा गर्ने निर्णयलाई गलत ठहराउँदै आफ्नो सेवासुविधा पुनः प्राप्त गर्ने मागसँग सम्बन्धित थियो । उक्त रिटको पेसी २०८२ असार १० का लागि तोकिएको छ ।

घिसिङको रिट पनि दर्ता

नेपाल विद्युत् प्राधिकरणका पूर्व कार्यकारी निर्देशक कुलमान घिसिङले आफूलाई गैरकानुनी रूपमा हटाइएको दाबी गर्दै सर्वोच्च अदालतमा रिट दायर गरेका छन् । बुधबार वारेसमार्फत् रिट पेश गरेपछि, सर्वोच्च अदालतले बिहीबार उक्त रिट दर्ता गरेको पुष्टि गरेको छ । घिसिङले प्रधानमन्त्रीको कार्यालय, ऊर्जा मन्त्रालय र नेपाल विद्युत् प्राधिकरणलाई विपक्षी बनाएर रिट दिएका हुन् ।

सरकारले सोमबारको मन्त्रिपरिषद् बैठकमा शाक्यलाई कार्यकारी निर्देशक नियुक्त गरेको थियो । यो कानूनी विवादले नेपाल विद्युत् प्राधिकरणको नेतृत्वको विषयमा नयाँ मोड लिएको छ । भविष्यमा यसको परिणामले प्राधिकरणको कार्य संचालनमा प्रभाव पार्न सक्छ ।

प्रकाशित : १४ चैत २०८१, बिहीबार 14:35