इदको अवसरमा सार्वजनिक विदा

द नेप्लिज संवाददाता

१७ चैत २०८१, आइतबार

विराटनगर– इस्लाम धर्मावलम्बीहरुको महान पर्व इद उल फित्रको वसरमा नेपाल सरकारले सोमबार सार्वजनिक विदा दिएको छ । गृह मन्त्रालयले आइतबार सार्वजनिक सूचना जारी गरी इद पर्वको अवसरमा सार्वजनिक विदा दिने निर्णय भएको जनाएको छ ।

महिना दिनदेखि रोजा (उपवास) बस्दै आएका इस्लाम धर्मावलम्बीहरुले आइतबार चाँद (चन्द्रमा) देखेको खुशीयालीमा सोमबार इद उल फित्र पर्व धुमधामका साथ मनाउने तयारीमा जुटेका छन् । यो वर्षको रमजानमा २९ दिन उपवास बसेपछि इस्लाम धर्मावलम्बीहरुले आइतबार चाँद हेरेका छन् । चाँद हेरेको भोलीपल्ट इद पर्व मनाउने परम्परा छ । साउदी अरेबीयामा शनिबार नै चाँद देखिएपछि आइतबार इद पर्व मनाइसकेका छन् ।

चाँद हेरेको खुशीयालीमा आइतबार बजारमा विभिन्न सामग्ी खरिद गर्ने इस्लाम धर्मावलम्बीहरुको भीड लागेको थियो । उनीहरुले नयाँ लुगा, सुनचाँदीका गहनालगायत केमामी सेबईलगायतका परम्परागत परिकार बनाउने सामग्री खरिद गरेको विराटनगरका मो. इझारुलले बताएका छन् ।

इद पर्वको अवसरमा सोमबार बिहान स्नान गरेपछि धार्मिक विधि ओजू (हात, मुख, अनुहार, टाउँको र खुट्टा धुने) गरेपछि नयाँ लुगा लगाएर इदगाहमा गएर नवाज पढ्ने परम्प्रा रहेको इझारुलले बताएका हुन् । नवाज पढेपछि एकआपसमा अंगालो हालेर खुशी सटासाट गर्छन् । त्यसपछि घर फर्केर परम्परागत परिकारहरु केमामी सेबइ, माशु, पुलाउलगायतका फलफूल एकसाथ मिलेर खाने चलन छ ।

प्रकाशित : १७ चैत २०८१, आइतबार 20:04