देशभर मौसम बदली र वर्षा

हिमाली क्षेत्रमा हिमपातको सम्भावना, जनजीवन प्रभावित हुन सक्ने चेतावनी

द नेप्लिज संवाददाता

२९ चैत २०८१, शुक्रबार

काठमाडौँ — देशभर पश्चिमी वायु, स्थानीय वायु र बंगालको खाडीबाट भित्रिएको जलवाष्पयुक्त हावाको संयुक्त प्रभावका कारण आज शुक्रबार अधिकांश स्थानमा मौसम बदली भइरहेको छ । मौसम पूर्वानुमान महाशाखाका अनुसार कोशी, मधेस र बागमती प्रदेशका केही स्थानमा तथा अन्य प्रदेशका एक–दुई स्थानमा मेघगर्जन र चट्याङ्गसहित हल्का वर्षा भइरहेको छ ।

महाशाखाले दिउँसो सातै प्रदेशमा हल्कादेखि मध्यम वर्षा हुने सम्भावना रहेको जनाएको छ । साथै मधेस बाहेक अन्य ६ प्रदेशका उच्च हिमाली भूभागमा आंशिकदेखि सामान्य बदली रही हल्का हिमपात हुने संभावना देखिएको छ।

राति पनि यही प्रणाली यथावत् रहने पूर्वानुमान गरिएको छ । यसका कारण उच्च पहाडी तथा हिमाली भेगमा हिमपात र अधिकांश स्थानमा वर्षा हुने भएकाले जनस्वास्थ्य, दैनिक जनजीवन, कृषि, सडक तथा हवाई यातायातमा प्रतिकूल असर पर्न सक्ने भएकाले आवश्यक सतर्कता अपनाउन महाशाखाले आग्रह गरेको छ ।

प्रकाशित : २९ चैत २०८१, शुक्रबार 06:52