मञ्च र क्लबद्वारा काेशीका प्रसूतिलाई सहयाेग

द नेप्लिज संवाददाता

२५ फागुन २०८१, आइतबार

विराटनगर- माहेश्वरी महिलामञ्च र रोटरी क्लब अफ विराटनगर फ्युजनले कोशी अस्पतालमा संयुक्त रूपमा मेटरनिटी किट वितरण गरेका छन् ।

मञ्च र क्लबले अन्तर्राष्ट्रिय महिला दिवसका अवसरमा २१ सुत्केरीलाई किट वितरण गरेका हुन् । मञ्चले ५० जना सुत्केरीका लागि किट तयार गरिएको र पहिलो चरणमा २१ जनालाई वितरण गरेको जनाएको छ ।

किटमा सुत्केरीका लागि गाउन, प्रोटिनरिच खाद्यान्न, नवजात शिशुका लागि झुल, कम्बल, भोटो सेट र साबुन राखिएको छ ।
मञ्चका अध्यक्ष ललिता जाजूले समाजमा आवश्यक परेकालाई मञ्चले नियमित रूपमा सहयाेग उपलब्ध गराउँदै आएको बताइन् ।

क्लबका अध्यक्ष विवेक अग्रवालले मानवसेवा नै सबैभन्दा ठूलो पुण्य र धर्मको कार्य भएको चर्चा गर्दै क्लब सधैँ यही अवधारणामा क्रियाशील रहेको उल्लेख गरे ।

कोशी अञ्चल अस्पतालका स्त्री तथा प्रसूति रोगविशेषज्ञ अञ्जु देवले कमजोर अवस्थाका सुत्केरी र नवजात शिशुलाई समाजका सबैले नि:स्वार्थ सहयोग गर्नु कर्तव्य र दायित्व भएको विचार व्यक्त गरिन् । डा. देवले माहेश्वरी महिला मञ्चले कोशी अस्पतालका बिरामीलाई निरन्तर सहयोग गरिरहेको स्मरण गरिन् ।

प्रकाशित : २५ फागुन २०८१, आइतबार 14:37