सञ्चारकर्मी सुरेश रजकको हत्याविरुद्ध महासंघको देशव्यापी आन्दोलन घोषणा

द नेप्लिज संवाददाता

१६ चैत २०८१, शनिबार

काठमाडौं — नेपाल पत्रकार महासंघले सञ्चारकर्मी सुरेश रजकको हत्यामा संलग्नलाई कडा कारबाहीको माग गर्दै देशव्यापी आन्दोलनको घोषणा गरेको छ । षड्यन्त्रपूर्वक आगजनी गरी कार्यस्थलमै पत्रकार रजकको हत्या गरिएको भन्दै घटनाको सत्यतथ्य छानबिन, दोषीलाई कारबाही तथा पीडित परिवारलाई राहत उपलब्ध गराउन महासंघले माग गरेको छ ।

महासंघको शनिबार बिहान बसेको आकस्मिक केन्द्रीय कार्यसमिति बैठकले पत्रकार हत्या, मिडियामाथिको आक्रमण र प्रेस स्वतन्त्रतामाथि आक्रमणको विरोधमा आइतबारदेखि तीन दिनसम्म चरणबद्ध आन्दोलन गर्ने निर्णय गरेको छ ।

महासंघले घटनाको गम्भीर अध्ययन गर्न सात सदस्यीय कार्यदल गठन गरेको छ । आन्दोलन कार्यक्रमअनुसार आइतबार देशभरका पत्रकारले कालोपट्टी बाँधेर विरोध जनाउने छन् । सोमबार महासंघ केन्द्रले संघीय सरकारका गृहमन्त्रीलाई, प्रदेश समितिहरूले प्रदेशका गृहमन्त्रीलाई तथा जिल्ला शाखाले प्रमुख जिल्ला अधिकारीमार्फत सरकारलाई ज्ञापनपत्र बुझाउने निर्णय गरेको छ ।

मंगलबार महासंघले घटनाका विषयमा सम्पादक तथा सरोकारवालासँग विशेष छलफल गर्नेछ । महासंघले पत्रकार रजक कार्यरत सञ्चारगृहलाई उनको परिवारलाई क्षतिपूर्ति, सेवासुविधा भुक्तानी र आवश्यक राहत उपलब्ध गराउन आग्रह गर्ने निर्णय पनि गरेको छ ।

प्रकाशित : १६ चैत २०८१, शनिबार 17:13