कवि नेवटियालाई साहित्य सम्मान

द नेप्लिज संवाददाता

२५ फागुन २०८१, आइतबार

विराटनगर– वरिष्ठ कवि लक्ष्मण नेवटियालाई साहित्य सम्मान प्रदान गरिएको छ । उद्योष दैनिकले आइतबार विराटनगरमा साहित्य सम्मान एवं कृति विमोचन कार्यक्रम आयोजना गरेर हास्य विधाका कवि नेवटियालाई सम्मान गरेको हो ।

कवि नेवटियाले विराटनगरबाट प्रकाशन भइरहेको उत्रिकामा २० वर्षदेखि निरन्तर “लक्ष्मणको कुनो” शीर्षकमा हास्य विधाको कविता लेख्दै आएका छन् । प्रत्येक आइतबार “लक्ष्मणको कुनो” शीर्षकमा नेवटियाको कविता प्रकाशन भइरहेको एक हजार अंक पुगेको छ । सोही अवसरमा नेवटियालाई साहित्य सम्मानबाट सम्मानित गरेको हो । नेवटियालाई कोशी प्रदेशका प्रदेश प्रमुख पर्शुराम खापुङले कदर पत्र र दोसल्ला ओढाएर सम्मान गरेका छन् ।

कार्यक्रममा कवि नेवटियाले नेपाली, हिन्दी र मारवाडी भाषामा लेखेको पुस्तक प्रदेश प्रमुख खापुङलगायतका अतिथिहरूले विमोचन गरेका थिए । नेवटियाले नेपाली भाषामा लेखेको ‘शब्दयज्ञ’ कविता संग्रह पुस्तकको पत्रकार एवं साहित्यकार प्रमोद प्रधानले समालोचना गरेका थिए । नेवटियाले हिन्दी भाषामा लेखेको ‘अदृश्यका अन्तरदर्शन’ पुस्तकको मोरङ उद्योग व्यापार संघका पूर्व अध्यक्ष एवं समाजसेवी सुरेशकुमार शर्माले समालोचना गरेका थिए ।

प्रकाशित : २५ फागुन २०८१, आइतबार 17:59