यौन हिंसा पीडित सप्तरीकी एक दलित किशोरीको हत्या

द नेप्लिज संवाददाता

४ वैशाख २०८२, बिहीबार

विराटनगर– सप्तरीको सुरुंगा–७, हरिपुर रामटोलकी १८ वर्षीया दलित किशोरी पूजाकुमारी राम तीनगछियाँ भन्ने स्थानमा मृत फेला परेकी छन् । तीन वर्षअघि यौन हिंसाको प्रयासबाट बाँच्न सफल भए पनि त्यसपछि विद्यालय जान छाडेकी पूजाको मृत्युले स्थानीय समुदायमा शोक र आक्रोश फैलिएको छ । यसले यौन हिंसाको त्रास, न्याय प्रणालीको कमजोरी र जातीय विभेदमाथि गम्भीर प्रश्न उठाएको छ ।

२०७८ मंसिर १४ मा विद्यालयबाट घर फर्किरहेकी पूजालाई स्थानीय ठाकुर थरका किशोरले बलात्कार गर्न खोजेका थिए । पूजा कराएर भाग्न सफल भइन् । प्रहरीले २० मंसिरमा ती किशोरलाई पक्राउ ग¥यो र जबर्जस्ती करणी उद्योगमा मुद्दा चलायो ।

तर अदालतले अभियुक्त नाबालक भएको भन्दै ८ महिना कैद र ७ हजार रुपैयाँ जरिवाना मात्र तोकेको थियो । अदालतको फैसलापछि अभियुक्त फरार भएका थिए । यस घटनापछि पूजा फेरि यौन हिंसामा पर्न सक्ने त्रासले विद्यालय जान छाडेकी थिइन् ।

सोमबार राति घरबाट बेपत्ता भएकी पूजाको शव बिहान तीनगछियाँमा फेला परेको थियो । प्रहरीले प्रारम्भिक अनुसन्धानमा हत्या भएको आशंका गरेको छ । प्रदेश प्रहरी कार्यालय जनकपुरधामबाट ल्याइएको तालिमप्राप्त कुकुरको सहायताले अनुसन्धान अघि बढाइएको छ । प्रहरीले तत्कालीन यौन हिंसामा दोषी ठहर भएका किशोरलाई पुनः पक्राउ गरेको छ ।

राष्ट्रिय मानव अधिकार आयोगले दलितहरूमाथि हुने हिंसाका दोषीहरूलाई कानुनी दायरामा ल्याउन सरकारको ध्यानाकर्षण गराएको छ । समाजशास्त्रीहरुका अनुसार पूजाकुमारी रामको हत्या केवल एक व्यक्तिको मृत्यु होइन; यो न्याय प्रणालीको कमजोरी, सामाजिक विभेद र महिला सुरक्षाको गम्भीर प्रश्न हो ।

यस घटनाले दलित समुदायमाथि हुने हिंसा र विभेदको गहिरो जरा देखाएको छ । सरकार, न्याय प्रणाली र समाजले यस्ता घटनाको गम्भीरता बुझेर तत्काल र दीर्घकालीन समाधान खोज्न आवश्यक भएको उनीहरुको बुझाइ छ ।

प्रकाशित : ४ वैशाख २०८२, बिहीबार 07:56