प्रधानमन्त्री ओलीकाे दवावमा प्रेस चाैतारीकाे निर्वाचन राेकेर निर्विराेध गर्दै

द नेप्लिज संवाददाता

११ चैत २०८१, सोमबार

विराटनगर– प्रेस चौतारी नेपालको जारी १० औँ महाधिवेशनमा नयाँ नेतृत्व चयनका लागि निर्वाचन प्रक्रिया राेकेर निर्विराेध निर्वाचित गर्ने तयारी गरेकाे छ । प्रधानमन्त्री तथा नेकपा एमालेकाे अध्यक्ष केपी शर्मा ओलीकाे दवावमा निर्वाचन प्रक्रिया राेकेर निर्विराेध निर्वाचित गर्न निर्वाचन आयाेग बाध्य भएकाे महाधिवेशन प्रतिनिधिहरूले गुनासाे पाेखेका छन् ।

निर्वाचन समिति सदस्य तथा एमालेकाे प्रचार विभाग प्रमुख राजेन्द्र गाैतमले निर्वाचन प्रक्रिया ठप्प गरेर निर्विराेध निर्वाचित भएकाे घाेषणा गर्न लागेकाे बताएका छन् । निर्वाचन समितिले सर्वसम्मत रुपमा नेतृत्व चयन गर्ने निर्वाचन कार्यतालिका सार्वजनिक गरेर सुरू गरेकाे निर्वाचन प्रक्रिया बीचमा नै राेकेर निर्विराेध निर्वाचित गर्न लागेकाे हाे ।

निर्वाचन आयोगले सार्वजनिक गरेको निर्वाचन कार्यतालिकामा उम्मेदवारको अन्तिम नामावली सोमबार ४ः२० बजे र त्यसको १० मिनेटपछि ४ः३० बजे निर्वाचनको अन्तिम परिणाम घोषणा गर्ने उल्लेख थियाे ।

निर्वाचन आयोगले मनोनयन दर्ताका लागि अध्यक्षका उम्मेदवारलाई ३५ हजार, पदाधिकारीको २५ हजार, केन्द्रीय आयोग अध्यक्षको १५ हजार र केन्द्रीय सदस्यको मनोनयन शुल्क १० हजार निर्धारण गरे पनि मनाेनयन दर्ता फारम वितरण नगरी निर्विराेध गर्न लागेकाे हाे ।

प्रधानमन्त्री तथा नेकपा एमाले अध्यक्ष केपी शर्मा ओलीले प्रेस चौतारीको अध्यक्षमा गणेश पाण्डे र महासचिवमा चेतन अधिकारीलगायत सम्पूर्ण कार्यसमिति निर्विरोध निर्वाचित गराउन दिएको निर्देशन अनुसार नेताहरुले चौतारीको कार्यसमिति निर्विरोध गराउन लागेका हुन् । निवर्तमान उपाध्यक्ष राजेश राईको प्यानलले निर्वाचन प्रक्रियाबाट नेतृत्व चयन गर्न माग गर्दै आएका छन् । उनले चुनावी प्रक्रियाबाट नेतृत्व चयनको माग गरेपछि अत्यन्तै दवाव आएको गुनासो पोखेका हुन् ।

प्रकाशित : ११ चैत २०८१, सोमबार 17:21