वायुसेवा निगमका पूर्वअध्यक्ष चतुर्वेदीको सम्पत्ति जफत गरेर सरकारको नाममा

द नेप्लिज संवाददाता

३१ चैत २०८१, आइतबार

काठमाडौँ – नेपाल वायुसेवा निगमका पूर्वअध्यक्ष रामाज्ञाप्रसाद चतुर्वेदीको चल–अचल सम्पत्ति सरकारद्वारा जफत गरिएको छ । सर्वोच्च अदालतको २०६८ भदौ २१ को फैसला अनुसार चतुर्वेदीको बैंक खातामा रहेको नगद, सेयर र जग्गा जफत गरिएको हो ।

अख्तियार दुरुपयोग अनुसन्धान आयोगले दायर गरेको मुद्दामा अदालतले चतुर्वेदीलाई भ्रष्टाचारको अभियोगमा दोषी ठहर गर्दै डेढ वर्ष कैद, १ करोड ३९ लाख रुपैयाँ जरिवाना र अवैध सम्पत्ति जफत गर्ने फैसला गरेको थियो ।
अदालतको फैसला कार्यान्वयन गर्दै गृह मन्त्रालय अन्तर्गतको कसुरजन्य सम्पत्ति व्यवस्थापन विभागले चतुर्वेदी र उनका परिवारको नाममा रहेका सम्पत्ति सरकारको अधिनमा ल्याएको हो ।

विभागका अनुसार चतुर्वेदीको एसबीआई बैंकमा रहेको ५७ हजार ६६२ रुपैयाँ ६५ पैसा र नेपाल बैंक लिमिटेडमा रहेको ३२ हजार १२७ रुपैयाँ ३४ पैसा पनि जफत गरिएको छ । त्यस्तै उनकी पत्नी आशाको नाममा नेपाल बैंक लिमिटेड काठमाडौँमा रहेको ३९ हजार २४१ रुपैयाँ २६ पैसा र हिमालयन बैंक लिमिटेड वीरगञ्जको खातामा रहेको ७४ हजार ९६१ रुपैयाँ ३६ पैसा जफत गरिएको हो ।

छोरी अदितीको एभरेष्ट बैंक न्युरोड शाखामा रहेको १० लाख रुपैयाँ र छोरा अभिषेकको कृषि विकास बैंकको खातामा रहेको ५० हजार १०८ रुपैयाँ २४ पैसा पनि जफत गरिएको विभागले जनाएको छ । यी रकममा जम्मा भएको ब्याजसमेत सरकारको खातामा जम्मा गरिएको छ ।

यससँगै चतुर्वेदीको नेपाल मेडिकल कलेजमा रहेको ३० हजार कित्ता सेयर, शिखर पेन्ट्समा रहेको ५ हजार कित्ता सेयर र छोरा अभिषेकको ओम हस्पिटल एण्ड रिसर्च सेन्टरमा रहेको ३० हजार कित्ता सेयर पनि जफत गरिएको हो ।
विभागले काठमाडौँ कोटेश्वरमा रहेको कित्ता नं. ६५ को २ रोपनी ९ आना १ पैसा ३ दाम र कित्ता नं. ७९१ को २ आना १ पैसा जमिनमध्ये चतुर्वेदीको भागमा पर्ने सम्पत्ति समेत सरकारको नाममा नामसारी गरिसकेको जानकारी दिएको छ ।
फैसलापछि चतुर्वेदी २०६८ भदौ २८ मा अदालतमा उपस्थित भइ ११ महिना ६ दिन जेल बसेका थिए । उनले अदालतको आदेश अनुसार १ करोड ११ लाख रुपैयाँ जरिवाना रकमसमेत बुझाएका थिए । २०७८ असोज २१ मा चतुर्वेदी काठमाडौँ–७ बुलबुलेमा मृत फेला परेका थिए ।

प्रकाशित : ३१ चैत २०८१, आइतबार १७:५३