दिपक मनाङेलाई सजाय छुट

द नेप्लिज संवाददाता

२३ फागुन २०८१, शुक्रबार

विराटनगर– दिपक मनाङे भनेर चिनिएका राजिव गुरूङले कैद सजायमा २० प्रतिशत छुट पाएका छन् । काठमाडौं जिल्ला अदालतका न्यायाधीश कमलप्रसाद पोखरेलको इजालसले शुक्रबार मनाङेलाई बाँकी सजायको २० प्रतिशत छुट दिन आदेश दिएका हुन् ।

मनाङले १२ फागुनमा मुलुकी ऐन दण्ड सजायको ४१ (क) अनुसार २० प्रतिशत छुट पाउने निवेदन दिएका थिए । निवेदनअनुसार २० प्रतिशत छुट दिन आदेश भएको उक्त अदालतका सूचना अधिकारी दिपककुमार श्रेष्ठले बताए ।

मुलुकी ऐन, दण्ड सजाय महलको दफा ४१ (क) ले अन्तिम फैसला भएको ६० दिनभित्र अदालतमा आत्मसमर्पण गरेमा कैद र जरिवानामा २० प्रतिशत छुट दिने प्रावधान छ । ’अदालतले फैसला गरेको ६० दिनभित्र उपस्थित भएको भन्दै मनाङेले कारागारमार्फत नै निवेदन दिएका थिए,’ उनले भने ।

उनलाई सर्वोच्च अदालतले ज्यान मार्ने उद्योगमा दोषी ठहर गरेको थियो । चक्रे मिलन भनिएका मिलन गुरूङको हात छिन्ने गरी तरबार प्रहार गरेको अभियोगमा २० वर्ष पछि सर्वोच्चबाट मनाङेलाई ५ वर्ष कैद सजायको फैसला भएको थियो । उनले यसअघि २ वर्ष ८ महिना जेल बसिसकेका थिए । उनी दुई वर्ष चार महिना जेल बस्नुपर्ने हुन्थ्यो । उनले त्यसमा पनि २० प्रतिशत छुट पाउने भएका छन् ।

प्रकाशित : २३ फागुन २०८१, शुक्रबार 17:43