मोरङमा विवाहित युवा जोडी मृत फेला

द नेप्लिज संवाददाता

२० फागुन २०८१, मङ्गलबार

विराटनगर– मोरङको पथरीशनिश्चरे–५ मौलीबारीस्थित बक्राहा खोलाको किनारको पिठारीको रूखको एउटै हाँगोमा मंगलबार बिहान एक विवाहित युवा जोडी नाइलनको डोरीमा झुन्डिएको अवस्थामा मृत फेला परेका छन् ।

उनीहरु पथरीशनिश्चरे–५ का २४ वर्षीय अजय टुडू र मोरङको कटहरी गाउँपालिका–६ माइती भएकी झापाको गौरीगन्ज गाउँपालिका–२ की २२ वर्षीया जुबामुनी हस्दा भएको प्रहरीले जनाएको छ । स्थानीयले देखेर खबर गरे पछि प्रहरी टोली घटनास्थल पुगेको थियो । प्रहरीका अनुसार घटनास्थल अजयको घरबाट करिब १ किलोमिटर दक्षिणमा पर्छ । मृत जुवामुनिका श्रीमान कान्छा टुडू रोजगारको क्रममा विदेशमा रहेको प्रहरीले जनाएको छ ।

अजयको पत्नी तथा दुई नाबालक सन्तान र जुवामुनिका डेढ वर्षका छोरा रहेको प्रहरीले जनाएको छ । प्रहरीका अनुसार अजयले जुवामुनिलाई गत आइतबार राति घरमा लिएर आएको पत्ता लागेको छ । अजयको घरबाट खाना खाएर राति नै उनी निस्किएको प्रहरीको सोधपुछमा खुलेको छ । निकटता हेर्दा दुवै जना विवाह अगाडि वा पछाडिदेखि प्रेम सम्बन्धमा रहेको हुनसक्ने अडकल प्रहरीले गरेको छ । घरभित्रको किचलोले प्रेम सम्बन्धमा समस्या उत्पन्न हुनसक्ने देखेपछि दुवै जनाले सल्लाहमै आत्महत्या गरेको हुनसक्ने प्रहरीको भनाइ छ । प्रहरीका अनुसार घटनास्थलको प्रकृतिको अध्ययन र प्रारम्भिक अनुसन्धानबाट दुवैले मञ्जुरीमै आत्महत्या गरेको जस्तो देखिन्छ । पोस्टमार्टमको रिपोर्ट र थप अनुसन्धानपछि मात्रै यथार्थ भन्न सकिने प्रहरीले जनाएको छ ।

प्रकाशित : २० फागुन २०८१, मङ्गलबार 17:40