चार भुटानीलाई तत्काल देश निकाला नगर्न सर्वोच्चको अन्तरिम आदेश

द नेप्लिज संवाददाता

४ वैशाख २०८२, बिहीबार

काठमाडौँ —अमेरिकाबाट डिपोर्ट भइ भुटान हुँदै नेपाल आएका चार भुटानी नागरिकलाई तत्काल देश निकाला नगर्न सर्वोच्च अदालतले अन्तरिम आदेश जारी गरेको छ । न्यायाधीश हरिप्रसाद फुयाँलको एकल इजलासले झापास्थित थुनामा रहेका अशोक गुरुङ, सन्तोष दर्जी, रोशन तामाङ र आशिष सुवेदीलाई वैशाख ११ मा अदालतमा पेस गर्न आदेश दिएको हो ।

उनीहरूको तर्फबाट नारायणकुमार सुवेदीले बन्दी प्रत्यक्षीकरण (हैबियस कर्पस) रिट दायर गरेका थिए । उनीहरूलाई अमेरिका सरकारले गत चैत ११ गते डिपोर्ट गरेको थियो । डिपोर्टपछि भारत हुँदै भुटान पुगेका उनीहरूलाई भुटान सरकारले पुनः देश निकाला गरेपछि उनीहरू नेपाल आइपुगेका थिए ।

नेपाल प्रवेशपछि अध्यागमन विभागले उनीहरूलाई नियन्त्रणमा लिइ देशनिकाला प्रक्रिया अघि बढाएको थियो । चारै जना नेपाली मूलका भुटानी नागरिक हुन् । उनीहरू नेपालमा शरणार्थीको रूपमा दर्ता भइ शरणार्थीकै हैसियतमा अमेरिका पुनर्वास भएका थिए । सर्वोच्चको आदेशसँगै उनीहरूलाई नेपालमा रहन दिने वा देश निकाला गर्ने विषयमा आगामी कानुनी निर्णय कुर्नैपर्छ ।

प्रकाशित : ४ वैशाख २०८२, बिहीबार 17:19