‘अवस्था बदल्न व्यवस्था बदलौं’

राष्ट्रिय राजनीतिमा नयाँ ध्रुवीकरणको संकेत

द नेप्लिज संवाददाता

२४ चैत २०८१, आइतबार

विराटनगर— राष्ट्रिय प्रजातन्त्र पार्टी (राप्रपा) ले यही चैत २६ मा काठमाडौँको भृकुटीमण्डपमा आयोजना गर्न लागेको आन्दोलनलाई संयुक्त जनआन्दोलन समितिले समर्थन जनाएको छ । ‘अवस्था बदल्न व्यवस्था बदलौं’ भन्ने मूल नाराका साथ आयोजना हुने उक्त प्रदर्शन तथा आमसभामा समितिका संयोजक जगमान गुरुङद्वारा जारी विज्ञप्तिमा समर्थन जनाइएको हो ।

विज्ञप्तिमा राष्ट्रवादी तथा देशभक्त नागरिकहरूलाई राष्ट्रिय झण्डासहित शान्तिपूर्ण रूपमा सक्रिय सहभागिता जनाउन आह्वान गरिएको छ । उक्त समिति राजसंस्था पुनस्र्थापनाका लागि क्रियाशील समूह हो जसले राप्रपाको आन्दोलनलाई समर्थन जनाउनु राजनीतिक परिदृश्यमा नयाँ ध्रुवीकरणको संकेत मान्न सकिन्छ ।

राजनीतिक विश्लेषकहरूका अनुसार यस्तो सहकार्यले नेपालमा राजसंस्थाको पुनस्र्थापनाका पक्षधर शक्तिहरूबीच एकता बढाउने सम्भावना छ । यसले आगामी दिनमा राजनीतिक समीकरणहरूमा नयाँ मोड ल्याउन सक्ने अनुमान गरिएको छ । यस परिप्रेक्ष्यमा राप्रपाको आन्दोलन र संयुक्त जनआन्दोलन समितिको समर्थनले नेपालको राजनीतिक भविष्यमा के कस्तो प्रभाव पार्नेछ भन्ने विषयमा चासो बढेको छ ।

प्रकाशित : २४ चैत २०८१, आइतबार 14:22