अधिवेशनको माग गर्दै तरुण दल मोरङको कार्यालयमा पुनः तालाबन्दी

यसअघि गरिएको तालाबन्दी तरुण दल मोरङ अध्यक्ष थापा निकटले फुटाएपछि पुनः तालाबन्दी

द नेप्लिज संवाददाता

२ असार २०८२, सोमबार

विराटनगर– नेपाली कांग्रेसको भातृ संगठन नेपाल तरुण दल मोरङको अधिवेशनको माग गर्दै सोमबार पुनः कार्यालयमा तालाबन्दी गरिएको छ । पूर्ण सदस्यता वितरण र जिल्ला अधिवेशनको माग गर्दै तरुण दल मोरङ उपसभापति खगेन्द्र थापा लगायतका समूहले गत वैसाख २१ गते कोंग्रेस मोरङ पार्टी कार्यालयमा नै रहेको तरुण दल मोरङको कार्यालयमा तालबन्दी गरेका थिए ।

पार्टीका जिल्ला नेतृत्वलाई ज्ञापन पत्र बुझाएर पनि कुनै सुनुवाइ नभएपछि उनीहरुले गरेको तालाबन्दी नेपाल तरुण दल मोरङ सभापति संजय थापाका समर्थक समूहले आइतबार फुटाएपछि सोमबार पुनः तालाबन्दी गरिएको हो ।

जिल्ला अधिवेशनको माग गर्दै आए पनि अध्यक्ष थापाले हालसम्म पूर्ण सदस्यता वितरण र अधिवेशन गराउन नचाहेको र पार्टी नेतालाई समेत वेवास्ता गर्दै आएको आन्दोलनरत तरुण नेताहरुको आरोप छ । आन्दोलनरत तरुण नेताहरुले आफूहरु पूर्ण सदस्यता वितरण गरी जिल्ला अधिवेशनको माग गर्दै पुनः गरिएको तालबन्दी पुनः फुटाउन खोजिए प्रतिवाद गर्ने चेतावनी दिएका छन् ।

प्रकाशित : २ असार २०८२, सोमबार 22:18