नेपाल र भट्टराईको मुद्दा पूर्ण इजलासमा पेस हुने

द नेप्लिज संवाददाता

१ फागुन २०८१, बिहीबार

विराटनगर– ललिता निवास जग्गा प्रकरणमा पूर्वप्रधानमन्त्रीद्वय डा. बाबुराम भट्टराई र माधवकुमार नेपाल विरुद्धको मुद्दा पूर्ण इजलासमा सुनुवाइ हुने भएको छ।

उनीहरु विरुद्ध भ्रष्टाचार र लिखतसम्बन्धी कसुर (किर्ते) मुद्दा चलाउनुपर्ने मागसहित सर्वोच्च अदालतमा दायर रिटमा पाँच वर्षपछि बिहीबार सुनुवाइ भएको हो । न्यायाधीशद्वय तिलप्रसाद श्रेष्ठ र नित्यानन्द पाण्डेले उक्त मुद्दा पूर्ण इजलासमा सुनुवाई गर्नुपर्ने आदेश दिएको हो ।

२०७६ माघ २२ मा अख्तियार दुरुपयोग अनुसन्धान आयोगले ललिता निवास प्रकरणमा एक सय ७५ जनाविरुद्ध मुद्दा हाले पनि नीतिगत निर्णय भन्दै नेपाल र भट्टराईविरुद्ध मुद्दा नचलाउने निर्णय भएको थियो । उक्त निर्णयलाई चुनौती दिँदै अधिवक्ता बालकृष्ण न्यौपानलेले २९ माघ २०७६ मा सर्वोेच्चमा रिट दर्ता गराएका हुन् ।

कानुनी प्रावधान अनुसार दुई आधारमा संयुक्त इजलासमा विचाराधीन मुद्दा सुनुवाइका लागि तीन सदस्यीय पूर्ण इजलासमा पेश हुन्छ । दुई न्यायाधीशहरूबीच राय बाझिएमा वा विषयवस्तुको गम्भीरता र गम्भीर कानुनी व्याख्याको विषय देखेमा दुई न्यायाधीशहरूले आपसी सहमतिमै मुद्दालाई पूर्ण इजलासमा पठाउने आदेश दिनसक्छन् ।

प्रकाशित : १ फागुन २०८१, बिहीबार 18:59