दुर्घटनामा बालिकासहित दुईको मृत्यु, २२ घाइते

द नेप्लिज संवाददाता

२६ चैत २०८१, मङ्गलबार

मर्चवार (रूपन्देही) — रूपन्देहीको लुम्बिनी सांस्कृतिक नगरपालिका–७ भरवलिया गाउँमा सोमबार साँझ भयानक सवारी दुर्घटना हुँदा एक बालिकासहित दुई जनाको ज्यान गएको छ । २२ जना घाइते भएका छन् । भ्यानमा सवार २४ जना यात्रु मायादेवी मन्दिरमा मुण्डन संस्कार सकेर घर फर्किंदै थिए ।

लु १ च २७६३ नम्बरको पिकअप भ्यान लुम्बिनी सांस्कृतिक नगरपालिका–७ स्थित शिवगढिया मोडमा अनियन्त्रित भइ पल्टिएको थियो । दुर्घटनामा गैँडहवा–१ शिवपुरवाकी १२ वर्षीया अस्मिता यादव र शुद्धोधन–६ मानमटेरियाकी ४८ वर्षीया जानमती यादवको घटनास्थलमै मृत्यु भएको जिल्ला प्रहरी कार्यालय रूपन्देहीले जनाएको छ ।

इलाका प्रहरी कार्यालय लुम्बिनीका अनुसार घाइतेमध्ये तीन जनाको लुम्बिनीस्थित लाइफ केअर अस्पतालमा र १९ जनाको भैरहवास्थित युनिभर्सल कलेज अफ मेडिकल साइन्सेज, रानीगाउँमा उपचार भइरहेको छ । दुर्घटनाको प्रत्यक्षदर्शी सन्दीप गुप्ताका अनुसार भ्यान तीव्र गतिमा गुडिरहेको थियो ।

मोडमा पुग्नेबित्तिकै सन्तुलन गुमाएर पल्टिएको उनले बताए । प्रहरीले कपिलवस्तु जिल्ला शुद्धोधन गाउँपालिका–४ बिठुवाका २६ वर्षीय चालक अशोक पासीलाई नियन्त्रणमा लिइ अनुसन्धान थालेको जनाएको छ । जिल्ला प्रहरी कार्यालय रूपन्देहीका प्रवक्ता सुरज कार्कीका अनुसार सामान बोक्ने भ्यानमा क्षमताभन्दा बढी यात्रु चढाइएकोले भारवहन क्षमता नाघेर दुर्घटना भएको प्रारम्भिक अनुसन्धानले देखाएको छ।

प्रकाशित : २६ चैत २०८१, मङ्गलबार 07:22