कांग्रेसभित्र मतभेदका कारण गणतान्त्रिक मोर्चा गठन रोकियो

द नेप्लिज संवाददाता

९ चैत २०८१, शनिबार

विराटनगर– राजतन्त्र पुनस्र्थापनाको पक्षमा सडकमा देखिएको आन्दोलनलाई कसरी हेर्ने भन्ने विषयमा नेपाली कांग्रेसभित्र मतभेद चुलिँदै गएको छ ।

यही विवादका कारण गणतन्त्र पक्षधर दलहरूको मोर्चा बनाउने तयारी रोकिएको छ । कांग्रेस सभापति शेरबहादुर देउवा सहितका केही नेताहरू राजावादी आन्दोलनविरुद्ध आक्रमक रूपमा प्रस्तुत हुनुपर्ने पक्षमा देखिएका छन् । तर महामन्त्री गगन थापासहितका केही नेताहरू भने आन्दोलनलाई एकपक्षीय रूपमा मात्रै हेर्न नहुने तथा सडकमा युवा पुस्तासमेत सक्रिय भएको विषयलाई ध्यान दिनुपर्ने पक्षमा छन् ।

माओवादी केन्द्रका अध्यक्ष पुष्पकमल दाहाल ‘प्रचण्ड’को प्रस्तावमा देउवा सहमत भए पनि कांग्रेसभित्रको असहमतिको कारण गणतान्त्रिक मोर्चा निर्माणको प्रक्रिया रोकिएको एक नेताले जानकारी दिए । यसअघि प्रधानमन्त्री तथा एमाले अध्यक्ष केपी शर्मा ओलीले पनि मोर्चा बनाउने प्रस्तावमा सहमति जनाएका थिए । उनले आफ्ना सल्लाहकार अग्नि खरेललाई कांग्रेस–माओवादीसँग छलफल गर्न खटाएका थिए ।

तर कांग्रेसभित्रकै अर्जुनरसिंह केसी र गृहमन्त्री रमेश लेखकले मोर्चा गठनप्रति असहमति जनाएका छन् । साथै शशांक कोइराला र शंकर भण्डारीजस्ता नेताहरूले पार्टीले धर्म निरपेक्षता, संघीयता र राजतन्त्रसम्बन्धी नीतिमा पुनर्विचार गर्नुपर्ने धारणा राखेका छन् ।

यही विवाद समाधान गर्न सभापति देउवाले आइतबार कार्यसम्पादन समितिको बैठक बोलाएका छन् । पार्टी कार्यालय सानेपामा बस्ने बैठकमा राजतन्त्र पुनस्र्थापनाको आन्दोलन, कांग्रेसको आधिकारिक धारणा र समसामयिक विषयमा छलफल हुने बताइएको छ ।

विशेष गरी फागुन २५ को प्रदर्शनमा योगी आदित्यनाथको फोटो देखिएको घटनालाई भारतीय हस्तक्षेपको रूपमा व्याख्या गर्नु गलत हुने कांग्रेसका केही नेताहरूको धारणा छ । बाह्य शक्तिसँग आन्तरिक विषयलाई नजोड्नुपर्ने तर्क राख्दै केही नेताहरूले विवादको अन्त्य खोजिरहेका छन् । कांग्रेसभित्र स्पष्ट धारणा बनाउन नसक्दा गणतन्त्र पक्षधर मोर्चा बनाउने योजना हाललाई स्थगित भएको छ ।

प्रकाशित : ९ चैत २०८१, शनिबार 16:08