ज्ञानेन्द्र शाहले बुझेनन् जरिवाना पत्र

द नेप्लिज संवाददाता

१७ चैत २०८१, आइतबार

काठमाडौं– स्थायी ठेगाना निर्मल निवास भए पनि नेपाल सरकारले उपलब्ध गराएको आवास सुविधा अन्तर्गत नागार्जुन दरबारमा बस्दै आएका ज्ञानेन्द्र शाहले काठमाडौं महानगरपालिकाले तोकेको जरिवाना पत्र बुझ्न अस्वीकारेका छन् ।

स्रोतका अनुसार राजा रहिसकेका ज्ञानेन्द्रले शनिबार साँझ राप्रपा नेपालका अध्यक्ष कमल थापासँग यस बारेमा परामर्श गरे पछि उक्त निर्णय लिएका हुन् । गत शुक्रबार तीनकुनेमा पूर्वराजा शाहका समर्थकहरूले आयोजना गरेको आन्दोलनका क्रममा तोडफोड र फोहोरको क्षतिपूर्ति स्वरूप महानगरपालिकाले ७ लाख ९३ हजार रुपैयाँ जरिवाना तोकेर पत्र पठाएको थियो।

तर जब उक्त पत्र लिएर महानगरपालिकाको टोली निर्मल निवास पुग्यो, त्यहाँबाट टोलीलाई फिर्ता पठाइयो । नगर प्रहरी प्रमुख राजुनाथ पाण्डे का अनुसार पूर्वराजाले पत्र बुझ्न मानेनन् । पत्र नबुझ्ने भन्दै निर्मल निवासले गेटबाटै नगर प्रहरीलाई फिर्ता पठाएको हो। ;अब हामी कानुनी प्रक्रियामा जान्छौं ,’ पाण्डेले भने । अब हुलाकबाट पत्र पठाउने तयारीमा महानगर छ।

पूर्वराजाले महानगरको निर्णय अस्वीकार गरेपछि अब कानुनी रूपमा के हुन्छ ? के महानगरपालिकाले अर्को कदम चाल्नेछ ? यो विषयले चर्चा पाउने निश्चित रहेको जानकारहरु बताउँछन् । ‘राजा हुँदा देशको संविधान विपरित कदम चालेर आफैले राजतन्त्र समाप्त पारेका ज्ञानेन्द्रले महानगरपालिकाको जरिवाना पत्र बुझ्दैनन् भने थाहा भएकै कुरा हो,’ एक सामाजिक सञ्जाल प्रयोगकर्ताले लेखेका छन् ।
अगाडि थपेका छन्, ‘तीनकुने हिंसाको दुई दिन बितिसक्दा पनि मृतक र घाइते परिवारलाई ज्ञानेन्द्रले संवोधन समेत गरेका छैनन्, यस्ता संवेदनहीन मान्छेलाई एक थरि फेरि राजा बनाउन हिंडेको देख्दा स्तब्ध छु ।’

प्रकाशित : १७ चैत २०८१, आइतबार 11:59