हिन्दु राष्ट्र पुनःस्थापनाको मागसहित काठमाडौँमा धार्मिक समूहको र्‍याली

द नेप्लिज संवाददाता

२८ चैत २०८१, बिहीबार

काठमाडौँ — हिन्दु राष्ट्रको मागलाई लिएर विभिन्न धार्मिक संघसंस्थाहरूले काठमाडौँमा मंगलबार शान्तिपूर्ण र्‍याली गरेका छन् । ॐकार परिवारअन्तर्गतका संस्थाहरूको संयोजनमा निकालिएको उक्त ‘सद्भाव र्‍याली गौशालाबाट सुरु भइ पुरानो बानेश्वर हुँदै मैतिदेवी मन्दिरमा पुगेर कोणसभामा परिणत भएको थियो ।

सहभागीहरूले हिन्दु राष्ट्र पुनःस्थापनाका साथै सामाजिक सद्भाव, धार्मिक सहिष्णुता र राष्ट्रिय एकताको पक्षमा विभिन्न नारा र प्लेकार्ड बोकेका थिए । आयोजकहरूका अनुसार यो प्रदर्शन कुनै दलविशेषको पक्ष वा विपक्षमा नभइ शुद्धरूपमा धार्मिक चेतना र सांस्कृतिक पहिचान जोगाउने उद्देश्यले गरिएको हो ।

२०६३ सालको जनआन्दोलनपछि नेपाल धर्मनिरपेक्ष राष्ट्र घोषणा गरिएको थियो । त्यसयता समय–समयमा विभिन्न धार्मिक समूह, नागरिक अभियन्ता तथा केही राजनीतिक दलहरूले हिन्दु राष्ट्र पुनःस्थापनाको माग उठाउँदै आएका छन् ।

उनीहरूको तर्कमा धर्मनिरपेक्षताले धार्मिक स्वतन्त्रता त दिइरहेको छ तर ऐतिहासिक रूपमा हिन्दु राष्ट्रको पहिचानलाई बिर्सिएको आरोप लागिरहेको छ । पछिल्लो समय संविधान संशोधनमार्फत पुनः हिन्दु राष्ट्र स्थापनाको माग केही समूहहरूबाट तीव्र रूपमा उठ्न थालेको छ । तर बहुसांस्कृतिक समाजमा धार्मिक सहिष्णुता र समानताको सन्देश समेत सँगै ल्याउने प्रयास उनीहरूले गर्दै आएका छन् ।

कोणसभामा बोल्ने वक्ताहरूले आफूहरूको आन्दोलन अहिंसात्मक, लोकतान्त्रिक र शान्तिपूर्ण भएको दाबी गर्दै राज्यसँग संवादको माध्यमबाट आफ्नो मागहरू प्रस्तुत गर्ने बताएका छन् । उनीहरूको भनाइमा हिन्दु राष्ट्र स्थापनाको माग कुनै समुदायविरुद्ध नभएर साझा सांस्कृतिक जरा र ऐतिहासिक पहिचानको संरक्षणका लागि हो ।

प्रकाशित : २८ चैत २०८१, बिहीबार 16:22