देश र जनताको निम्ति सहमति गर्न बाध्य भयौं : अध्यक्ष दाहाल

भिजिट भिषाको छानविनले कांग्रेससँगको सम्बन्ध सुमधुर हुने, नहुने निश्चित हुन्छ

द नेप्लिज संवाददाता

३२ जेठ २०८२, शनिबार

विराटनगर– नेकपा माओवादी केन्द्रका अध्यक्ष पुष्पकमल दाहालले भिजिट भिषा प्रकरणमा देश र जनताको हितका निम्ति सहमति गर्न बाध्य भएको बताएका छन् । विराटनगरमा शनिबार पत्रकारहरुसँगको कुराकानीमा अध्यक्ष दाहालले निजामति कर्मचारी सेवा र शिक्षा ऐन संसदबाट छिटो पारित गर्नुपर्ने लगायतको विषयले सहमति गर्नुपरेको भन्दै निरिहता व्यक्त गरेका हुन् ।

‘भिजिट भिषाको सम्बन्धमा छानविन, अध्ययन गरेर आवश्यक नीतिगत संरचना बनाउन एक महिनाभित्र छानविन समिति गठन गर्ने सहमति भएको छ,’ उनले भने, ‘भिजिट भिषाको विषय अहिलेको गृहमन्त्रीसँग मात्रै सम्बन्धित छैन । यो अत्यन्तै गम्भिर र संवेदनशील छ ।’ सञ्चारकर्मीको प्रश्नमा अध्यक्ष दाहालले अहिलेको सहमति उधारो नभएको र उधारो भए एक महिनापछि पुनः लड्ने बताएका छन् ।

उनले अहिलेको यो सहमतिले भिजिट भिषाको सम्बन्धमा छानविन र अध्ययन कसरी अघि बढ्छ त्यसले नेपाली कांग्रेससँगको समन्ध सुधार हुने, नहुने निश्चित हुने बताएका हुन् । ‘भिजिट भिषा प्रकरणमा सदन अबरोध गरेर कुनै गल्ती नगरेको र यो विषयमा सरकारको गम्भिरता र संवेदनशीलता देखियोस् भनेर विरोध गरेर सहमति गरियो,’ उनले भने, ‘यो सहमतिमा सत्तासँग सबन्धित कुनै कुरा छैन र द्वन्द्वकालको घटनामा अग्नी सापकोटामाथि छानविन नगरियोस् भनेर पनि साटेको होइन, यो वाहियात कुरा हो । यो सहमति र अग्नी सापकोटाको विषयबीच कुनै सम्बन्ध छैन ।’

प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र आफू एउटै भएको भास्य निरंकुशतावादी, राजावादी र अराजकतावादीले निर्माण गरेको र सबैको आ–आफ्नै विचार, सिद्धान्त र लाइन भएको उनले स्पष्ट पारेका थिए । अध्यक्ष दाहालले पार्टीका नेता जनार्दन शर्मालाई पार्टी छोड्न आफूले नभनेको र यो एकदमै वाहियात कुरो भएको बताए ।

प्रकाशित : ३२ जेठ २०८२, शनिबार 10:24