संसदमा प्रचण्डको आक्रोश, नीति तथा कार्यक्रमप्रति तीव्र असन्तुष्टि

द नेप्लिज संवाददाता

२२ वैशाख २०८२, सोमबार

काठमाडौँ — माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले प्रतिनिधिसभामा बोल्दै वर्तमान ओली नेतृत्वको सरकारलाई ‘जनताका मनबाट ढलेको’ भन्दै गम्भीर आलोचना गरेका छन्। आर्थिक वर्ष २०८२/८३ को नीति तथा कार्यक्रममाथिको संसदीय छलफलमा भाग लिँदै उनले सरकारले जनअपेक्षाअनुसार कुनै पनि काम नगरेको आरोप लगाउँदै लोकतान्त्रिक प्रणालीमाथि नै खतरा पैदा भएको तर्क गरे।

‘प्राविधिक रूपमा त सरकार ढलेको छैन,’ भन्दै उनले भने, ‘जनताका मन–मस्तिष्कमा, विशेषगरी म घुमेर आएको तराई–मधेसमा नैतिक रूपमा यो सरकार ढलिसकेको छ।’

प्रचण्डको टिप्पणीले न केवल सरकारको कार्यशैलीमाथि गम्भीर प्रश्न उठाएको छ, तर नीति तथा कार्यक्रममा प्रस्तुत प्राथमिकतामाथि समेत सशंकाको वातावरण बनाएको छ। उनले समृद्धि र आत्मनिर्भर अर्थतन्त्रको दिशामा सरकार चुकेको आरोप लगाउँदै कृषि, पर्यटन, सूचना प्रविधिजस्ता महत्वपूर्ण क्षेत्रका योजनामै सरकार ‘कैची’ चलाएको बताए।

‘मेक इन नेपाल’ र ‘मेड इन नेपाल’ अभियानलाई हटाउनु उद्यमशीलता र स्वरोजगारको सम्भावनालाई क्षति पुर्याउनु हो भन्ने उनको ठहर छ। यति मात्र होइन, उनले ‘विकासको ढाँचामा कोर्स करेक्सन’ गर्ने सरकारको दाबीलाई पनि खोक्रो करार दिए।

दाहालको अभिव्यक्तिमा दुई तिहाइ बहुमतको अहंकार लोकतान्त्रिक प्रक्रियामाथि हावी भएको गुनासो झल्किएको छ। ‘अहंकारको बेलुन फुटिसकेको छ,’ भन्दै उनले सरकारको नीति तथा कार्यक्रम जनताको चाहना र देशको दीर्घकालीन हित विपरीत रहेको दाबी गरे।

यो प्रचण्डको टिप्पणी सत्ता गठबन्धन विरुद्ध बढ्दो असन्तोष र सम्भावित राजनीतिक ध्रुवीकरणको संकेतका रूपमा विश्लेषण गर्न सकिन्छ। यसले संसदभित्र मात्र होइन, सडक र जनमतमा पनि सरकारप्रति असन्तुष्टिको लहर बलियो बन्दै गएको स्पष्ट देखिएको छ।

प्रकाशित : २२ वैशाख २०८२, सोमबार 17:18