सरकार भाग्दैन, जिम्मेवारी लिन्छ : गृहमन्त्री

द नेप्लिज संवाददाता

२७ चैत २०८१, बुधबार

काठमाडौँ — गृहमन्त्री रमेश लेखकले तीनकुनेमा भएको प्रदर्शनका क्रममा घाइते भएका व्यक्तिहरूको सम्पूर्ण उपचार खर्च सरकारले व्यहोर्ने स्पष्ट गरेका छन् ।

सिभिल अस्पतालमा बुधबार घाइतेहरूसँग भेटपछि सञ्चारकर्मीहरूसँग कुरा गर्दै लेखकले चैत्र १५ को प्रदर्शनमा घाइते भएकाको निःशुल्क उपचार सुनिश्चित गरिने बताए । उनले भने, ‘सरकारले उपचार खर्च व्यहोर्ने निर्णय गरिसकेको छ र त्यो कार्यान्वयनमा पनि प्रतिबद्ध छ ।’

उनका अनुसार घाइतेहरूले औषधि बाहिरबाट खरिद गर्नु परेको भए पनि त्यसको बिल अस्पतालमार्फत स्वास्थ्य तथा जनसंख्या मन्त्रालयमा पेस गरेपछि सरकारले उक्त खर्च फिर्ता गर्नेछ । घाइतेका आफन्तले राखेको ‘उपचारपछिको भविष्यका लागि सरकारले के गर्छ ?’ भन्ने प्रश्नमा गृहमन्त्री लेखकले सरकारको ध्यान रहने र आवश्यक सहयोगका उपायहरूबारे विचार भइरहेको जानकारी दिए ।

प्रकाशित : २७ चैत २०८१, बुधबार 21:03