‘श्री ५ को सरकार’ भन्ने बानीले....

द नेप्लिज संवाददाता

२९ माघ २०८१, मङ्गलबार

विराटनगर– २०४६ पछि धेरै खालको राजनीतिक परिवर्तन हुँदै मुलुकमा लोकतन्त्र आएको हो । व्यवस्था परिवर्तन भए पनि प्रमुख दलका नेताहरुमा पुरानै सोच र शब्दले शासन गरिरहेकै छ । नानीबाबुदेखि ‘श्री ५ को सरकार’ भन्ने बानी उनीहरुमा छँदैछ । नेताहरूले बेलाबेलामा बोली र लेखाइमा ’श्री ५ को सरकार’ भनिहाल्दा रहेछन् ।

२०७७ माघमा तत्कालीन खानेपानी मन्त्री मणि थापाले एउटा भाषणमा हत्तारोमा ’श्री ५ को सरकार’ भने पछि गाह्रोमा परिहाले । तत्कालीन नेकपाका नेतासमेत उनले सुर्खेतको एक कार्यक्रममा भनेका थिए,’सबैलाई सम्मान गर्न चाहन्छु जो मञ्चमा आसीन हुनुहुन्छ । र सुर्खेतका आदरणीय जनसमुदायहरू म सबैलाई नेकपा स्थायी समितिको तर्फबाट र श्री ५ को सरकारको तर्फबाट यो कार्यक्रममा ...ए सरी नेपाल सरकारको तर्फबाट यो कार्यक्रममा तपाईंहरूलाई लाल सलाम भन्न चाहन्छु ।’ सामाजिक सञ्जालमा खरो आलोचना भूलवश त्यस्तो हुन गएको भन्दै थापाले क्षमा मागेका थिए ।

उक्त घटनाको ४ वर्ष पछि युवा तथा खेलकुदमन्त्री तेजुलाल चौधरीले त्यही गल्ती दोहो¥याए । तर उनले टाइपमा त्रुटि भएकाले नेपाल स्काउटको नियमावलीमा ’श्री ५ को सरकार’ हुन गएको प्रष्टिकरण दिनु परेको छ । उनले सोमबार नेपाल स्काउटलाई पत्र लेख्दै नेपाल स्काउट कर्मचारी सेवा नियमावली २०५२ (संशोधन २०८१) को अनुसूची ४(क) को १ र ४(ख) को ४ मा टाइपमा भूलवश नेपाल सरकारको सट्टा ’श्री ५ को सरकार’ हुन गएको बताएका छन् ।

स्काउट राष्ट्रिय परिषद्का अध्यक्ष मन्त्री चौधरीले पठाएको पत्रमा भनिएको छ, ’...श्री ५ को सरकार शब्दावली नेपालको संविधान २०७२ भाग – १ धारा–१ मा यो संविधान नेपालको मूल कानुन हो, यस संविधानसँग बाझिने कानुन बाझिएको हदसम्म अमान्य हुनेछ भन्ने व्यवस्थाविपरीत रहेको पाइएकाले उक्त त्रुटि सच्चयाइ नियमावलीमा उल्लेखित श्री ५ को सरकार लेखिएको शब्दावलीको सट्टा नेपाल सरकार शब्दावली राखी प्रमाणीकरण गरी कार्यान्वयनका लागि पठाइएको छ ।’

’श्री ५ को सरकार’ लेखेपछि सामाजिक सञ्जालदेखि सदनसम्म मन्त्री चौधरीको आलोचना भएको थियो । राष्ट्रिय सभामा माओवादी सांसद मायाप्रसाद शर्माले सोमबार मन्त्री चौधरीसँग यसबारे जवाफ मागेका थिए । ‘युवा तथा खेलकुदमन्त्रीज्यूको कार्य सम्पादन अनुसूची ४ (१) बमोजिम फारम मूल्यांकनमा श्री ५ को सरकारले प्रचलित कानुनअनुसार ल्याएको भन्ने कुरा आएको छ । यो के हो ? ०४७ सालको संविधान कार्यान्वयन हो कि ? संशोधन भइसक्यो बुझ्न चाहन्छु,’ सांसद शर्माको कटाक्ष थियो ।

प्रकाशित : २९ माघ २०८१, मङ्गलबार 14:26