रवि लामिछाने फेरि पक्राउ

द नेप्लिज संवाददाता

२२ चैत २०८१, शुक्रबार

काठमाडौँ — अदालतको आदेशको पालना गर्दै प्रहरीले राष्ट्रिय स्वतन्त्र पार्टी (रास्वपा)का सभापति रवि लामिछानेलाई शुक्रबार साँझ बुढानीलकण्ठ स्थित हेपाली हाइट निवासबाट पक्राउ गरेको छ । उच्च अदालत तुलसीपुरको बुटवल इजलासले सहकारी ठगी र संगठित अपराधमा लामिछानेलाई पुर्पक्षका लागि थुनामा पठाउन आदेश दिएको थियो ।

बुटवलको सुप्रिम सहकारी प्रकरणमा रुपन्देही जिल्ला अदालतले १ करोड धरौटी रकम मागेको आदेशमा चित्त नबुझाएर लामिछानेले उच्च अदालतमा निवेदन दिएका थिए । उच्चले जिल्लाको आदेश बदर गरेर उनलाई थुनामै राख्ने आदेश गरेको छ ।

उक्त आदेश लगतै रविलाई पक्रिन प्रहरी घरमै पुगेको थियो । रास्वपा एक नेताका अनुसार केही सादा पोशाकका सहित प्रहरीहरू उनको घर पुगेर उनलाई पक्राउ गरेका हुन् । उनलाई रुपन्देही पठाउने तयारी काठमाडौं प्रहरीले गरेको छ । प्रहरी आफ्नो घरमा आइसकेपछि लामिछानेले भने गिरफ्तारी दिन लागेको सामाजिक संजाल फेसबुकमा लेखेका छन् ।

‘सम्मानित अदालतको आदेशको सम्मान गर्दै म आफै आजै, अहिले नै गिरफ्तारी दिँदैछु । साथै न्यायालयका अन्य ढोकाहरू मेरा लागि खुल्ला होलान् नै । न्यायका लागि दुनियाँका सबै ढोका ढकढकाउँछु,’ रविले लेखेका छन् ।
आफूमाथि अन्याय भएको पनि रविले लेखेका छन् । ‘ममाथि ठूलो अन्याय भएको छ,’ उनले भनेका छन् । उनले पार्टीको शनिबार आयोजना हुन लागेको चितवनको कार्यक्रम नरोक्न पनि आग्रह गरेका छन् । उनलाई आज राति जिल्ला प्रहरी परिसर काठमाडौंको हिरासतमा राखिने बताइएको छ। उनलाई शनिबार रुपन्देही लगिने छ।

उच्च अदालत तुलसीपुरको बुटवल इजलासले बुटवलको सुप्रिम सहकारी ठगी र संगठित अपराधसम्बन्धी कसुरमा लामिछानेलाई पूर्पक्षका लागि थुनामा पठाउने आदेश गरेको थियो । न्यायाधीशद्वय रमेश ढकाल र स्वीकृति पराजुलीको इजलासले रविलाई धरौटीमा छाड्ने जिल्ला अदालत रुपन्देहीको आदेश बदर गरेको थियो ।

योसँगै गोरखा मिडिया नेटवर्कका तत्कालीन सञ्चालक छविलाल जोशीलाई थुनामा पठाउने जिल्ला अदालतको आदेश पनि उच्चले सदर गरेको उपरजिस्ट्रार हरिगोपाल ज्ञवालीले जानकारी दिए ।

प्रकाशित : २२ चैत २०८१, शुक्रबार 21:42