गर्मी छल्न विराटनगरका ज्येष्ठ नागरिकलाई पंखा वितरण

द नेप्लिज संवाददाता

१ असार २०८२, सोमबार

विराटनगर– अत्यधिक गर्मीले जनजीवन प्रभावित भइरहेको बेला विराटनगर महानगरपालिकाले गर्मी छल्न ज्येष्ठ नागरिकहरुलाई टेबल पंखा वितरण गरेको छ । विराटनगरको १ नम्बर वडाले ज्येष्ठ नागरिकहरुलाई पंखा वितरण गरेको हो ।

वडाध्यक्ष काजीबहादुर बस्नेतले ८० वर्ष उमेर पूरा गरेका ४५ जना ज्येष्ठ नागरिकहरुलाई पंखा वितरण गरेका छन् । वडाले विपन्न गरीव परिवारका जयेष्ठ नागरिकलाई गर्मीबाट राहत दिन गतवर्षदेखि ल्याएको पंखा वितरण कार्यक्रमलाई यस वर्षपनि निरन्तरता दिएको हो ।

‘गर्मीले अस्तव्यस्त बनेको ज्येष्ठ नागरिकको दैनिक जीवनमा पंखा प्राप्तीले सहजता ल्याउने विश्वास छ,’ वडाध्यक्ष बस्नेतले भने, ‘स्थानीय सरकारका लागि सबै नागरिक बराबर रहेकोले देश, समाज र परिवारका लागि जीवनभरि योगदान गरेका ज्येष्ठ नागरिकका लागि यो सानो पंखा सम्मान पनि हो ।’

वडा सदस्य लक्ष्मी राई, वडासचिव सुमन दाहाल, विद्युत शाखा सुमन कामत र दुर्गा पण्डितका साथ वडाध्यक्ष बस्नेतले प्रत्येक ज्येष्ठ नागरिकको घर घरमा पुगेर पंखा वितरण गरेका हुन् । बस्नेतले गतवर्ष १३६ जना ज्येष्ठ नागरिकलाई पंखा वितरण गरिएका थिए । वडाभित्र ८० वर्ष उमेर पूरा भएका १८२ जना ज्येष्ठ नागरिक मात्रै भएकाले धनी गरीव नछुट्याइ प्राथमिकता क्रममा सबैलाई पंखा उपलब्ध गराएको बस्नेतको भनाइ छ ।

अध्यक्ष बस्नेतले वडाको बजेटले ज्येष्ठ नागरिकहरुलाई तीर्थयात्रासमेत गराउँदै आएका छन् ।

प्रकाशित : १ असार २०८२, सोमबार 20:17