पत्रकार रजकलाई गोली नलागेको पोस्टमार्टम रिपोर्टमा पुष्टि

२० चैत २०८१, बुधबार

विराटनगर – काठमाडौंको तीनकुनेमा जलेको अवस्थामा मृत फेला परेका २९ वर्षीय पत्रकार सुरेश रजकलाई गोली नलागेको पोस्टमार्टम रिपोर्टले पुष्टि गरेको छ ।

त्रिवि शिक्षण अस्पतालमा गरिएको शव परीक्षणपछि फरेन्सिक मेडिसिन विभाग प्रमुख डा. गोपाल चौधरीले रजकको मृत्यु आगलागीका कारण भएको स्पष्ट पारे । पोस्टमार्टम रिपोर्ट अनुसार शरीर जलेको छ । फोक्सोमा धुवाँ प्रवेश गरेको पाइएको छ । शरीरमा गोली लागेको छैन ।

‘यसबाट उनीलाई पहिला हत्या गरेर पछि आगो लगाइएको भन्ने अड्कल असत्य सावित हुन्छ,’ डा. चौधरीले भने । यसअघि रजकको मृत्युबारे विभिन्न खाले शंका गरिँदै आएको थियो । उनलाई गोली लागेको हुन सक्ने आशंकामा चिकित्सकहरूले पोस्टमार्टम अघि एक्स–रे गराउनुपर्ने अडान राखेका थिए ।

तर रिपोर्टले गोली नलागेको पुष्टि गरेपछि घटनाबारे नयाँ प्रश्नहरू उठेका छन् । अहिले प्रहरी अनुसन्धान जारी छ । सुरेश रजकको मृत्यु दुर्घटना थियो वा योजनाबद्ध हत्या विस्तृत छानबिनपछि मात्र यकिन हुनेछ ।

प्रकाशित : २० चैत २०८१, बुधबार 16:33