ऊर्जा मन्त्री खड्काले लोडसेडिङ अन्त्यको घोषणा गरे

द नेप्लिज संवाददाता

२७ चैत २०८१, बुधबार

काठमाडौँ – ऊर्जा, जलस्रोत तथा सिँचाइमन्त्री दीपक खड्काले नेपालमा लोडसेडिङको समस्या अब समाप्त हुने दाबी गरेका छन् । मन्त्री खड्काले बुधबार रसुवा जिल्लामा ७८ मेगावाट क्षमता भएको साञ्जेनखोला जलविद्युत् आयोजनाको उद्घाटन गर्दै देशभर २४ घण्टा लगातार विद्युत् आपूर्ति गर्ने आश्वासन दिएका छन् ।

मन्त्री खड्काले लोडसेडिङको अन्त्यसँगै नागरिकको घरघर र उद्योगमा विद्युत् आपूर्ति सुनिश्चित गर्ने सरकारको प्रतिबद्धता व्यक्त गरे । उनले भनें, ‘लोडसेडिङ अब इतिहास हो, यसका बारेमा कुनै भ्रममा नपर्नुस् ।’

यसका साथै मन्त्रीले आफूले नेपाल विद्युत् प्राधिकरणका पूर्वप्रमुख कुलमान घिसिङको स्थानमा नियुक्त गरिएको हितेन्द्रदेव शाक्यलाई एशियाका उत्कृष्ट इञ्जिनियरको रूपमा उच्च सम्मान दिएको बताए । शाक्यको नेतृत्वमा विद्युत् प्राधिकरणले थप उचाइ हासिल गर्ने उनले विश्वास व्यक्त गरे ।

मन्त्री खड्काले आगामी १० वर्षमा २८ हजार ५ सय मेगावाट विद्युत् उत्पादन गर्ने लक्ष्य रहेको बताउँदै निजी क्षेत्र र दातृ निकायहरूको सहयोगमा यो लक्ष्य हासिल हुने बताए । ‘यसको लागि हामी सबैलाई एकसाथ लाग्नुपर्ने छ,’ उनले भने ।
जलविद्युत् क्षेत्रलाई सरकारको मुख्य प्राथमिकता रहेको उल्लेख गर्दै उनले भारतसँग १० हजार मेगावाट विद्युत् निर्यात गर्ने सम्झौतासमेत भएको जानकारी दिएका छन् । साथै बंगलादेशसँग ४० मेगावाट विद्युत् निर्यात गरिसकेको उल्लेख गर्दै मन्त्री खड्काले उत्पादन भएको विद्युत् व्यर्थ नजाने भन्दै निजी क्षेत्रलाई ढुक्क भएर लगानी गर्न आग्रह गरे ।

मन्त्री खड्काले यथासम्भव ऊर्जा क्षेत्रको अवरोधलाई पार गर्दै प्राधिकरणलाई थप प्रगति र सफलतामा पुर्याउने प्रतिबद्धता व्यक्त गरे । यसबाट नेपालमा ऊर्जा संकटको समाधान मात्र नभएर दिगो विकास र अन्तर्राष्ट्रिय ऊर्जा व्यापारमा पनि नयाँ सम्भावनाहरू खुल्ने अपेक्षा गर्न सकिन्छ ।

विश्लेषकहरुका अनुसार मन्त्री खड्काले लोडसेडिङको अन्त्य र विद्युत् उत्पादनमा आत्मनिर्भरता हासिल गर्ने आश्वासन दिएपनि वास्तविकता भने अझै चित्तबुझ्दो छैन । नेपालको ऊर्जा क्षेत्रमा अवस्थित समस्याहरू जस्तै– हाइड्रोपावर परियोजनाको समयसीमा र खर्चको अनियमितता, जलवायु परिवर्तनका कारण पानीको आपूर्तिमा उतारचढाव र प्राधिकरणको प्रशासनिक कमजोरीलाई ध्यानमा राख्दा सरकारका दाबीलाई आलोचनाको दृष्टिले हेर्नुपर्ने आवश्यकता छ ।
यद्यपि मन्त्रीको दृष्टिकोण र निजी क्षेत्रको सहभागिता सबै पक्षमा ऊर्जा क्षेत्रको विकासका लागि प्रेरणादायक हो । अझै सरकारको रणनीति र योजनामा स्पष्टता र यथार्थपरक कार्ययोजना हुन आवश्यक रहेको विज्ञहरु बताउँछन् ।

प्रकाशित : २७ चैत २०८१, बुधबार 17:44