सहकारी विवादमा मन्त्रीका स्वकीय सचिवद्वारा आत्महत्या

द नेप्लिज संवाददाता

१३ फागुन २०८१, मङ्गलबार

विराटनगर– बागमती प्रदेशका सहकारी तथा गरिबी निवारणमन्त्री मदुकुमार श्रेष्ठका स्वकीय सचिव ३६ वर्षीय रवि थापाले विष सेवन गरी आत्महत्या गरेको खुलेको छ । काठमाडौँको कलंकीस्थित सहिद मेमोरियल अस्पतालमा उपचारको क्रममा सोमबार उनको मृत्यु भएको हो ।

विषादी सेवन पछि साथीको कोठामा अचेत फेला परेका थापालाई तत्काल अस्पताल लगिएको प्रहरी परिसर काठमाडौँले जनाएको छ । धादिङ, धुनीबेसी–९ का थापाले कलंकीस्थित एक साथीको डेरामा कोही नभएको मौकामा दिउँसो २ बजे विषादी सेवन गरेको प्रहरीको सोधपुछमा खुलेको छ ।

थापाको साथबाट फेला परेको एक पेजको पत्र (सुसाइड नोट) मा सहकारीको पैसा लेनदेनको विषयमा आफूलाई जोडिएकोले बेइज्जत महसुस भएको उल्लेख गरेका छन् । थापा गत शुक्रबार मन्त्री श्रेष्ठसँगै काठमाडौँ गएका थिए । काम विशेषले मन्त्री श्रेष्ठ शनिबार रौतहटमा जानुपर्ने भएकाले थापालाई काठमाडौँमै छोडेर फर्किएका थिए ।

सुमेरु सहकारीका विषयमा गत आइतबार सार्वजनिक भएको अडियोका सन्दर्भमा थापाको नाम जोडिएको प्रहरीको भनाइ छ । सुमेरु सहकारीका पूर्वसचिवसमेत रहेका विनोद आचार्यसँग उक्त सहकारीको समस्या मिलाउने विषयमा कुराकानी भएको भनिएको अडियो क्लिप सार्वजनिक भए पछि थापाले आत्महत्या गरेका हुन् ।

अडियो क्लिपको परीक्षण रिपोर्ट पछि थप प्रक्रिया अघि बढाउने प्रहरीले जनाएको छ । मृतक थापाको साथबाट प्राप्त पत्रमा मन्त्री श्रेष्ठ र सचिवालयले राम्रो काम गरेकाले बदनाम गर्न आफ्नो अडियो सम्पादन गरी प्रयोग गरेको विवरण रहेको छ ।

स्वकीय सचिव थापाको अडियोमा उल्लेख भएको सुमेरु सहकारीलाई मन्त्रालयले गत पुस २८ मा समस्याग्रस्त सहकारी घोषणा गरेको थियो । सहकारीले मन्त्रालयको निर्णयको विरुद्धमा सर्वोच्चमा रिटसमेत दायर गरेर अल्पकालीन आदेश लिएको छ । उक्त सहकारीको विषयमा सर्वोच्चले छलफलका लागि दुवै पक्षलाई बोलाएको छ ।

प्रकाशित : १३ फागुन २०८१, मङ्गलबार 18:09