प्रेस चौतारीमा नेतृत्व चयन सर्वसम्मत गर्ने निर्वाचन कार्यतालिका

अध्यक्षको मनोनयन शुल्क ३५ हजार

द नेप्लिज संवाददाता

११ चैत २०८१, सोमबार

विराटनगर– प्रेस चौतारी नेपालको जारी १० औँ महाधिवेशनमा सर्वसम्मत रुपमा नेतृत्व चयन गर्ने निर्वाचन कार्यतालिका सार्वजनिक भएको छ । निर्वाचन आयोगले सार्वजनिक गरेको निर्वाचन कार्यतालिकामा उम्मेदवारको अन्तिम नामावली सोमबार ४ः२० बजे र त्यसको १० मिनेटपछि ४ः३० बजे निर्वाचनको अन्तिम परिणाम घोषणा गर्ने उल्लेख छ ।

निर्वाचन आयोगले मनोनयन दर्ताका लागि अध्यक्षका उम्मेदवारलाई ३५ हजार, पदाधिकारीको २५ हजार, केन्द्रीय आयोग अध्यक्षको १५ हजार र केन्द्रीय सदस्यको मनोनयन शुल्क १० हजार निर्धारण गरेको छ । प्रेस चौतारीको नयाँ कार्यसमिति सर्वसम्मत चयन गर्न मनोनयन शुल्क अत्यधिक तोकेको पत्रकारहरुको भनाइ छ ।

प्रधानमन्त्री तथा नेकपा एमाले अध्यक्ष केपी शर्मा ओलीले प्रेस चौतारीको अध्यक्षमा गणेश पाण्डे र महासचिवमा चेतन अधिकारीलगायत सम्पूर्ण कार्यसमिति निर्विरोध निर्वाचित गराउन दिएको निर्देशन अनुसार नेताहरुले चौतारीको कार्यसमिति निर्विरोध गराउन खटिएका छन् । निवर्तमान उपाध्यक्ष राजेश राईको प्यानलले निर्वाचन प्रक्रियाबाट नेतृत्व चयन गर्न माग गर्दै आएका छन् । उनले चुनावी प्रक्रियाबाट नेतृत्व चयनको माग गरेपछि अत्यन्तै दवाव आएको दिएको गुनासो पोखे ।

प्रकाशित : ११ चैत २०८१, सोमबार 15:27