एमाले मोरङमा इत्तर पक्षका अजम्बर राईको प्यानल विजयी

गौरी बस्नेत खड्का

२३ फागुन २०८१, शुक्रबार

विराटनगर– नेकपा एमाले मोरङमा अध्यक्षका उम्मेदवार इत्तर पक्षका अजम्बर राईको प्यानल विजयी भएको छ । इत्तर पक्षका अध्यक्ष उम्मेदवार अजम्बर राईले ४४६ मत ल्याएर विजयी हुँदा संस्थापन पक्षका उम्मेदवार राजकुमार ओझाले ४०७ मत मात्रै प्राप्त गरेर पराजित भएको निर्वाचन समितिले जनाएको छ ।

इत्तर पक्षका उपाध्यक्षमा सागर थापाले ४२२ मत ल्याएर विजयी भएका हुन् भने संस्थापन पक्षकी शान्ति लिम्बूले ३९१ मत प्राप्त गरिन् । सचिवमा इत्तर पक्षका सोमराज थापाले ४६२ मत ल्याएर जिवयी हुँदा संस्थापनका रबिन थापाले ३६८ मत ल्याएर चित बुझाए । उपसचिवमा पुरुषतर्फ इत्तर पक्षका सन्तोष वान्तवाले ४९० मत ल्याएर विजयी भएका छन् भने संस्थापनका इर्जालाल राजबंशीले ३११ मत प्राप्त गरेका हुन् । उपसचिव महिलातर्फ इत्तर पक्षकी उषा झाले ४१८ ल्याएर विजयी हुँदा संस्थापन पक्षकी विराटनगर उपमहानगरकी उपप्रमुख शील्पा निराला कार्कीले ४०५ मत ल्याएर पराजय बेहोरेकी हुन् । ९११ मतदाता रहेकोमा ८८८ मत खसेको थियो ।

निर्वाचनको मतगणना विराटनगरको पाञ्चालीस्थित एमाले पार्टी कार्यालयमा भएको छ । एमालेको १० औं जिल्ला अधिवेशन आइतबारबाट सुरु भई नयाँ नेतृत्व चयनका लागि बुधबार राती मतदान सम्पन्न भएको थियो ।

प्रकाशित : २३ फागुन २०८१, शुक्रबार 18:58