चिकित्सक संघ पछि हटे, कोशी अस्पतालमा उपचार सुरु

द नेप्लिज संवाददाता

१४ वैशाख २०८२, आइतबार

विराटनगर– नेपाल चिकित्सक संघ कोशी शाखाले कोशी अस्पतालमा सेवा ठप्प गर्ने निर्णयबाट पछि हट्दै कोशी अस्पतालमा उपचार सुरु गरेको छ । चिकित्सक संघले शुक्रबार आवासीय चिकित्सकहरुको आन्दोलनमा समर्थन जनाउँदै कोशी अस्पतालमा बहिरंग सेवा बन्द गराएका थिए । कोशी अस्पतालमा उपचार ठप्प गरेर निजी अस्पतालमा बिरामीको उपचार गरिरहेको भन्दै चौतर्फी दबाब बढेपछि चिकित्सक संघ पछि हटेको हो ।

चिकित्सक संघले सामुदायिक अस्पतालमा उपचार सेवा ठप्प गरेकोले अवरोध गर्दा विपन्न र पहुँचविहीन नागरिक उपचार सेवाबाट बञ्चित भएको भन्दै द नेप्लिज डट कमले समाचार र सम्पादकीय प्रकाशन गरेको थियो । यसले नागरिक समाजका साथै आन्दोलनरत चिकित्सकहरुको समेत ध्यानाकर्षण भएको थियो ।

चिकित्सक संघ कोशीका महासचिव डा. बालकृष्ण साहले अस्पतालमा उपचार ठप्प गरेपछि आममान्छे उपचारबाट बञ्चित भएको र आवासीय चिकित्सकहरुसँग काठमाडौंँमा वार्ता पनि हुने भएकोले आइतबारबाट सरकारी अस्पतालमा अवरोध नगरेको बताएका छन् ।

चिकित्सक संघ कोशीले आवासीय चिकित्सकहरुको आन्दोलनप्रति समर्थन जनाउँदै आइतबार प्रदर्शन गरेर जिल्ला प्रशासन कार्यालय मोरङ अगाडि धर्ना दिएका छन् । उनीहरुले आवासीय चिकित्सकहरुको मागलाई समर्थन जनाउँदै चर्को नारा घन्काएका थिए ।

प्रकाशित : १४ वैशाख २०८२, आइतबार 12:32