मिश्र र प्रसाईँको मुद्दामा अदालतद्वारा प्रहरीलाई झपार

द नेप्लिज संवाददाता

१० वैशाख २०८२, बुधबार

काठमाडौँ — राजसंस्था पुनःस्थापनाको माग गर्दै चैत १५ मा भएको आन्दोलनपश्चात् पक्राउ परेका राप्रपाका नेता रविन्द्र मिश्र र व्यवसायी दुर्गा प्रसाईँलाई थप तीन दिन प्रहरी हिरासतमा राखेर अनुसन्धान गर्न जिल्ला अदालत काठमाडौँले अनुमति दिएको छ ।

प्रहरी प्रशासनले उनीहरूलाई २० दिनसम्म थुनामा राखेर अनुसन्धान गर्न अनुमति माग गरेको भए पनि जिल्ला न्यायाधीश ध्रुवराज कार्कीको इजलासले उक्त मागलाई खारेज गर्दै तीन दिन मात्र म्याद दिएको हो । अदालतले अनुसन्धानमा भइरहेको ढिलाइप्रति प्रश्न उठाउँदै छिटो निष्कर्षमा पुग्न दबाबसमेत दिएको छ ।

राज्यविरुद्धको अपराध र संगठित अपराधको अभियोगमा पक्राउ परेका मिश्र र प्रसाईलाई प्रहरी प्रशासनले अनुसन्धान लम्ब्याउँदै हिरासतमा राख्न खोजिरहेका बेला अदालतले निष्पक्ष र समयमै प्रक्रिया टुंग्याउन निर्देशन दिएको हो।न्यायाधीश कार्कीको इजलासले तीन दिनपछि म्याद थपका लागि प्रस्तुत गर्दा अनुसन्धानमा बाँकी रहेका प्रमाणहरूसमेत स्पष्ट रुपमा पेश गर्न आदेश दिएको छ । साथै अभियुक्तहरूको स्वास्थ्य अवस्थालाई मध्यनजर गर्दै छिटो अनुसन्धान सम्पन्न गरी जरुरत भएमा हाजिरी जमानीमा छाड्नेतर्फ समेत विचार गर्न भनिएको छ ।

अदालतको आदेशमा भनिएको छ, ‘प्रतिवादी रविन्द्र मिश्र उक्त कसुरमा संलग्न रहेको पुष्टि गर्ने कुन कागजात वा प्रमाण संकलन गर्न बाँकी छ भन्ने विषयमा म्याद थप निवेदनमा स्पष्ट उल्लेख गरिएको देखिँदैन । सो अवस्थालाई ध्यान दिँदा प्रतिवादीहरूको बाँकी बयान लिने कार्य सम्पन्न गरी संलग्नताको प्रमाण सहित थप म्याद माग गर्नुपर्नेछ । हाललाई तीन दिनको म्याद थप दिइएको छ ।’

प्रकाशित : १० वैशाख २०८२, बुधबार 23:22