चैते दसैँमा खसीको मासु खाँदै गर्दा घाँटीमा अड्किएर मृत्यु

द नेप्लिज संवाददाता

२३ चैत २०८१, शनिबार

अछाम — चैते दशैंको अवसरमा खसीको मासु खाँदै गर्दा अछामका एक पुरुषको ज्यान गएको छ । साँफेबगर–५ नवाठानाका ४२ वर्षीय डम्मर कुँवरको घाँटीमा मासु अड्किएपछि ज्यान गएको जिल्ला प्रहरी कार्यालय अछामले पुष्टि गरेको छ ।

प्रहरीका अनुसार शनिबार गाउँमा काटिएको खसीको मासु पकाएर खानेक्रममा कुँवरको घाँटीमा मासुको टुक्रा अड्किएको थियो । सास फेर्न गाह्रो भए पछि उनी बेहोस भएका थिए ।

परिवारजन र स्थानीयले तत्कालै उनलाई न्याय हेल्थ अस्पताल, बयलपाटा पु¥याए पनि उपचारकै क्रममा दिउँसो उनको मृत्यु भएको प्रहरीले जनाएको छ । प्रहरीले घटनाबारे थप अनुसन्धान गरिरहेको छ ।

नेपालमा मासु खाँदा घाँटीमा अड्किएर मृत्यु हुने घटनाहरू विगतमा पनि भएका छन् । चिकित्सकहरू यस्तो अवस्थामा तुरुन्त प्राथमिक उपचारको ज्ञान र उपलब्धताले ज्यान जोगाउन सक्ने बताउँछन् ।

‘हाइमलिक मनोवर’ जस्तो आपतकालीन विधि आम नागरिकले सिक्न सके यस्तो दुर्घटनाबाट बच्न सकिन्छ भन्ने सन्देश यो घटनाले दिएको छ । हाइमलिक मनोवर भनेको कसैको श्वास नलीमा खाद्यान्न वा अन्य वस्तु अड्किएको अवस्थामा पेटमुनि बलपूर्वक थिचेर निकाल्ने उपाय हो ।

प्रकाशित : २३ चैत २०८१, शनिबार 21:57