‘भिड नियन्त्रण गर्न गोली चलाउनु पर्यो’

द नेप्लिज संवाददाता

२० चैत २०८१, बुधबार

काठमाडौं– नेपाल प्रहरीले तीनकुनेमा चैत १५ मा उत्तेजित भिडलाई नियन्त्रणमा लिन गोली चलाउनुपरेको स्पष्ट पारेको छ । बुधबार आयोजित पत्रकार सम्मेलनमा नेपाल प्रहरीका केन्द्रीय प्रवक्ता डीआईजी दिनेश आचार्यले दिउँसो २ बजेर ५४ मिनेट तिर अवस्था नियन्त्रण बाहिर जान थालेपछि गोली चलाउनुपरेको जानकारी दिए।

डीआईजी आचार्यले भने, ‘सबै उत्तेजित भिडका कारण भएको घटना हो । अवस्था नियन्त्रणमा लिन गोली चलाउनुपरेको हो ।’

प्रदर्शन भएको ६ दिनपछि बुधबार पत्रकार सम्मेलन गर्दै प्रहरीले व्यक्ति लक्षित ५८ राउण्ड गोली प्रहार भएकोमा २० जनालाई लागेको बताएको छ । प्रहरीका अनुसार गोली लागेर १८ पुरुष र दुई महिला घाइते भए ।
प्रहरीको गोली लागेर कीर्तिपुरका सविन महर्जनको तत्काल मृत्यु भएको थियो । प्रहरीको गोली लागेर रेविका खत्रीसहितका अन्य केहीको गम्भीर अवस्थामा उपचार भइरहेको छ ।

स्थिति अनियन्त्रित हुन थालेपछि १९२ पटक हवाई फायर गरेको र भीड नियन्त्रणका लागि ७४६ राउन्ड अश्रु ग्यास प्रहार गरेको प्रहरीले स्वीकारेको छ । रेविका, उनका दाजुसहित केही व्यक्तिलाई भने झुक्किएर गोली लागेको भन्दै प्रहरीेले आत्मालोचना गरेको छ ।

यसअघि पनि विभिन्न स्थानहरूमा प्रहरीले भिड नियन्त्रणका लागि बल प्रयोग गरेको घटनाहरू भएका छन् । उदाहरणका लागि मंसिर २८ मा बाराको सिम्रौनगढमा झडप नियन्त्रणका क्रममा प्रहरीले गोली चलाउँदा एक युवकको मृत्यु भएको थियो । तीनकुने घटनाको विस्तृत विवरण भने अझै सार्वजनिक गरिएको छैन ।

प्रकाशित : २० चैत २०८१, बुधबार 16:45