इन्टरनेटको तार तान्ने क्रममा करेन्ट लाग्दा गोरखामा एक जनाको मृत्यु

१० चैत २०८१, आइतबार

गोरखा- आरुघाट गाउँपालिका-६ स्थित कल्लेरीमा इन्टरनेटको तार तान्ने क्रममा करेन्ट लागेर एक व्यक्तिको मृत्यु भएको छ।

मृत्यु हुनेमा २७ वर्षीय हरि विक रहेका छन् । आज बिहान डिसहोमको फाइबर इन्टरनेटको तार तान्ने क्रममा पोलमा चढ्दा विकलाई करेन्ट लागेको जिल्ला प्रहरी कार्यालय गोरखाका सूचना अधिकारी एवं प्रहरी नायब उपरीक्षक इन्द्रप्रसाद सुवेदीले जानकारी दिए।

‘करेन्ट लागेर गम्भीर घाइते हुनुभएका विकलाई तत्काल उद्धार गरी गोरखा अस्पताल पुर्‍याइएको थियो, तर उपचारका क्रममा चिकित्सकले मृत घोषित गर्नुभयो,’ प्रहरी नायब उपरीक्षक सुवेदीले भने।
प्रारम्भिक अनुसन्धान अनुसार विक पोलमा चढ्ने क्रममा बिजुलीको नाङ्गो तारमा छोइएकाले करेन्ट लागेको पाइएको छ। घटनाको थप अनुसन्धान भइरहेको प्रहरीको भनाइ छ। यस प्रकारका घटनाबाट जोगिन सुरक्षाका मापदण्ड पालना गर्न तथा आवश्यक सावधानी अपनाउन सरोकारवालाहरूले सचेत रहनुपर्ने विज्ञहरूले सुझाव दिएका छन्।

प्रकाशित : १० चैत २०८१, आइतबार 14:56