ताप्लेजुङमा आज रातिदेखि निषेधाज्ञा अन्त्य

द नेप्लिज संवाददाता

१३ फागुन २०८१, मङ्गलबार

विराटनगर– जिल्ला प्रशासन कार्यालय ताप्लेजुङले फागुन ११ देखि लागू गरेको निषेधाज्ञा आज (मंगलबार) राती ११ बजेदेखि अन्त्य हुने सूचना जारी गरेको छ ।
प्रमुख जिल्ला अधिकारी नेत्रप्रसाद शर्माद्वारा मंगलबार साँझ जारी अर्को सूचनामा उक्त जानकारी गराइएको हो । जिल्ला सुरक्षा समितिले मंगलबार गरेको सिफारिस अनुसार निषेधाज्ञा अन्त्य भएको सूचनामा भनिएको छ ।
पाथीभरा क्षेत्रमा केबलकार बनाउन नहुने भन्दै आन्दोलनमा उत्रिएका समूह र प्रहरीबिच फागुन १० को साँझ सदरमुकाम फुङलिङको वीरेन्द्र चोकमा झडप भएको थियो । यसमा केही आन्दोलनकारी र प्रहरी घाइते भएका थिए । यसपछि पाथीभराको निर्माणाधीन केबलकार क्षेत्र र सदरमुकाम फुङलिङ बजारमा निषेधाज्ञा जारी भएको थियो । नो केबलकार समूहले सरकारले आह्वान गरेको वार्ताको माहोल बनाउन निषेधाज्ञा हटाउनु पर्ने सर्त राखेको थियो ।

प्रकाशित : १३ फागुन २०८१, मङ्गलबार 21:16