जन्तीको बस र मिनी ट्रक ठोक्किँदा एकको मृत्यु

द नेप्लिज संवाददाता

९ फागुन २०८१, शुक्रबार

विराटनगर– उदयपुरको उदयपुरगढीमा बिहीबार राति जन्तीको बस र मिनी ट्रक ठोक्किँदा एक यात्रुको मृत्यु भएको छ । २६ जना घाइते भएको जिल्ला ट्राफिक प्रहरी कार्यालयले जनाएको छ ।

प्रहरीका अनुसार बाराबाट जन्ती लिएर गाईघाट जाँदै गरेको बस र तेजपत्ता बोकेर निस्कँदै गरेको मिनी ट्रक ठोक्किएर दुर्घटना भएको थियो । दुर्घटनामा गम्भीर घाइते बारागढी गाउँपालिका–४ का ७० वर्षीय सीताराम धामीको विराटनगरस्थित न्यूरो अस्पतालमा उपचारका क्रममा राति नै मृत्यु भएको प्रहरीले भनेको छ ।

प्रहरीका अनुसार बाराको बारागढी गाउँपालिका–४ का १५ वर्षीय दीपक चौधरी, ४२ वर्षीय श्रीकान्त बछार र ५५ वर्षीय बलिराम चौधरी पनि गम्भीर घाइते छन । घाइते हुनेहरु सबै जन्ती आउनेहरु हुन् । यान्त्रिक गडबडीले दुर्घटना भएको सुरुवाती अनुसन्धानबाट खुलेको प्रहरीले बताएको छ ।

प्रकाशित : ९ फागुन २०८१, शुक्रबार 15:56