१ सय २० सशस्त्र प्रहरीलाई कारबाही

द नेप्लिज संवाददाता

६ फागुन २०८१, मङ्गलबार

विराटनगर– सामाजिक सञ्जालमा संगठनको पोसाकमा विभिन्न क्रियाकलाप गरेको तस्बिर तथा भिडियो बनाइ अपलोड गरेको पाइए पछि १ सय २० जनालाई विभागीय कारबाही गरेको सशस्त्र प्रहरी बलले जनाएको छ ।

केन्द्रीय प्रवक्ता कुमार न्यौपानेका अनुसार उनीहरुले फेसबुक, म्यासेन्जर, ट्वीटर (एक्स), इन्स्टाग्राम, टिकटक, युट्युब, इमो, वीच्याट लगायतका सामाजिक सञ्जालमा ती दृश्य सामग्री अपलोड गरेका थिए । कारबाही परेकाहरूमा नायव निरीक्षक ४ , सहायक निरीक्षक ५ , वरिष्ठ हवल्दार ६, हवल्दार ३, सहायक हवल्दार ९ , जवान ९१ र परिचर २ छन् । उनीहरूलाई नसिहत, बढुवा रोक्का, चेतावनी, सचेत, ध्यानाकर्षण र मौखिक संझाइबुझाइ गराइएको उनले बताए ।

सशस्त्र प्रहरी बलको प्रधान कार्यालयले सामाजिक सञ्जालमा अमर्यादित ढंगको तस्बिर तथा भिडियो बनाइ अपलोड गर्ने २८ सशस्त्र प्रहरी कर्मचारीहरूमाथि विभागीय कारबाही गरी विवरण यथाशीघ्र खुलाई पठाउन मातहत कार्यालयहरूलाई निर्देशन समेत दिएको छ । फागुन ४ मा मातहत कार्यालयहरूमा आदेशात्मक पत्राचार गर्दै कारबाही गर्न भनिएकाहरूमा सशस्त्र प्रहरी सहायक निरीक्षक ६ , सहायक हवल्दार १ र जवान २१ जना रहेको प्रवक्ता न्यौपानेले बताए ।

प्रकाशित : ६ फागुन २०८१, मङ्गलबार 19:33