बेरोजगार महिलाहरुलाई यौन धन्दामा धकेल्नेहरु पक्राउ

द नेप्लिज संवाददाता

४ फागुन २०८१, आइतबार

विराटनगर– देशमा रोजगारको खडेरी छ । स्वरोजगार गर्नेलाई पनि प्रोत्साहन छैन । यो यथार्थ हो । तर घरमा बसेर पनि दैनिक व्यवहार चल्दैन । कामको खोजीमा घर बाहिर निस्कनै पर्छ । यस्तोमा स्वार्थी र अपराधीको हातमा पर्यो भन्ने जीवनलाई नरक बनाउँछ ।

पर्साको विरगञ्ज महानगरपालिका–१५ मा होटल सञ्चालन गरिरहेका दुई व्यक्तिले कामको खोजीमा रहेका समस्याग्रस्त परिवारका महिलाहरुलाई फसाएर यौन व्यवसायमा लगाउने गरेको प्रहरी अनुसन्धानमा खुलेको छ ।

मानव बेचबिखनको आरोपमा पक्राउ परेका वीरगंज–१६ बस्ने ४५ वर्षीय गिनीलाल गुप्ता र भारत बिहार पूर्वी चम्पारण थाना नकरदेही ग्राम भवानीपुर–६ का ४० वर्षीय जय प्रकाश साह यस्तै पात्रहरु हुन् ।

प्रहरीका अनुसार कामको खोजीमा रहेका महिलाहरुलाई आफ्नो होटेलमा ठूलाठूला मान्छे आउने हुनाले पछि राम्रो जागिर पाइहालिन्छ भन्दै सुरुमा सानोसानो काममा लगाउँथे । उनीहरुलाई विस्तारै विभिन्न खाले प्रलोभनमा पारी होटलमा आएका ग्राहकहरूसँग शारीरिक सम्पर्क राख्न लगाउने गरेको केन्द्रीय प्रहरीले जनाएको छ ।

प्रहरीका अनुसार विरगञ्ज महानगरपालिका–१५ का होटेलहरुमा यसरी युवतीहरुलाई गलत काममा लगाउने गरेको सूचनाको आधारमा प्रहरीले छापा मारेको थियो । जिल्ला प्रहरी कार्यालय पर्साबाट खटिएको प्रहरीले ती दुईलाई पक्राउ गर्नुको साथै ४ जना महिलाको उद्धार समेत गरेको थियो । उनीहरू विरुद्ध मानव बेचबिखन तथा ओसार पसार (नियन्त्रण) ऐन, २०६४ बमोजिमको कसुरमा प्रहरीबाट थप अनुसन्धान भइरहेको छ ।

प्रकाशित : ४ फागुन २०८१, आइतबार 14:22