शोरुम फुटाएर कार चोर्ने पक्राउ

द नेप्लिज संवाददाता

२ फागुन २०८१, शुक्रबार

विराटनगर । प्रहरीले विराटनगरमा गएराती सोरुम फुटाएर कार चोरी गर्ने एक जनालाई शुक्रबार पक्राउ गरेको छ । सुनसरीको गढी गाउँपालिका–४ घर भइ विराटनगर–४ मा बस्दै आएका २४ वर्षीय मन्तोषकुमार बिनलाई सुनसरीको इनरुवाबाट प्रहरीले पक्राउ गरेको हो ।

विराटनगर महानगरपालिका–३ एयरपोर्ट मोडनजिक एम.के. रिसेप्शनको अगाडी पूजा इन्टरनेशनल नेपाल प्रा.लि.ले सञ्चालन गरेको फोक्स बगान कम्पनीको सोरुमको शिशा फुटाएर बा०१३०च ८५८१ नम्बरको ८० लाख मूल्य बराबरको अनटेस्ट टाइगुन कार चोरी गरेको थियो । सिसि क्यामराको फुटेज अनुसार बिहान २ बजेतिर सिमेन्टको ब्लकले शोरुमको शिशा फुटाइ चोरले गाडी लिएर गएको तर इनरुवामा इन्धन सकिएको अवस्थामा प्रहरीले पक्राउ गरेको जिल्ला प्रहरी मोरङको निमित्त प्रवक्ता हेमराज ओलीले बताए । उक्त घटनाको बारेमा थप अनुसन्धान भइरहेको उनले सुनाए ।

प्रकाशित : २ फागुन २०८१, शुक्रबार 15:11