वैदेशिक रोजगार ठगीमा तीन पक्राउ

द नेप्लिज संवाददाता

२१ फागुन २०८१, बुधबार

विराटनगर– आकर्षक तलबका साथ विभिन्न देश पठाइदिन्छु भनेर रकम ठग्ने ३ जनालाई प्रहरीले पक्राउ गरेको छ । प्रहरीका अनुसार पक्राउ पर्नेहरूमा ललितपुरको ललितपुर–१४ बस्ने चितवन भरतपुर–१७ का ४६ वर्षीय अंगद कुमार जोशी, काठमाडौँ–२६ बस्ने गोरखा बारपाक सुलिकोट–४ का ४७ वर्षीय जगदिश्वर पनेरू र काठमाडौँ–३ बस्ने उदयपुर उदयपुरगढी–१ का ३३ वर्षीय नर माया कार्की छन् ।

पक्राउ मध्ये अंगदले जापान पठाइदिन्छु भन्दै १ पीडितबाट ११ लाख ६० हजार रूपैयाँ, जगदिश्वरले क्रोएसिया पठाइदिन्छु भन्दै १ पीडितबाट २ लाख रूपैयाँ र नर मायाले क्रोएसिया पठाइदिन्छु भन्दै १ पीडितबाट १ लाख ९९ हजार रूपैयाँ लिएर सम्पर्कविहिन भएको पीडितहरूले प्रहरीमा उजुरी दिएका थिए ।
काठमाडौँ उपत्यका अपराध अनुसन्धान कार्यालयको प्रहरीले अंगदलाई काठमाडौँको नागार्जुन–१ बाट सोमबार तथा जगदिश्वरलाई काठमाडौँ–१२ बाट र नर मायालाई काठमाडौँ–३ बाट मंगलबार पक्राउ गरेको हो ।

प्रकाशित : २१ फागुन २०८१, बुधबार 19:42