भारत–पाकिस्तान तनाव चरममा (बुधबार साँझ सम्मको क्रमबद्ध अपडेट)

द नेप्लिज संवाददाता

२४ वैशाख २०८२, बुधबार

विराटनगर– भारतीय सेनाले मंगलबार राति र बुधबार बिहानको बीचमा पाकिस्तान र पाकिस्तान प्रशासित कश्मीर (पीओके) स्थित आतंकवादीका नौवटा आधारस्थलहरूमा लक्षित हवाई आक्रमण गरेको जनाएको छ।

२२ अप्रिलमा कश्मीरको पहलगाममा भएको आतंकवादी आक्रमणमा २६ जनाको मृत्यु भएपछि भारत र पाकिस्तानबीचको सम्बन्ध अत्यन्त तनावग्रस्त बनेको छ। त्यस घटनापछि भारतीय प्रधानमन्त्री नरेन्द्र मोदी र रक्षा मन्त्री राजनाथ सिंहले कडा जवाफ दिने चेतावनी दिएका थिए।

भारतीय सेनाले उक्त कारबाहीलाई ‘अप्रेशन सिंदूर’ नाम दिएको छ। यसबारे जानकारी दिन बुधबार बिहान दुईजना महिला सैन्य अधिकारीहरू मिडियाको सामु प्रस्तुत भए :

कर्नल सोफिया कुरैशी
भारतीय सेनाकी अधिकारी कर्नल सोफिया कुरैशीले सन् २०१६ मा पुणेमा आयोजित बहुराष्ट्रिय सैन्य अभ्यासमा भारतीय टुकडीको नेतृत्व गरेकी थिइन्। उनी यस्तो अभ्यासमा नेतृत्व गर्ने पहिलो महिला अधिकारी हुन्। गुजरात निवासी कुरैशीले बायोक्यामिस्ट्रीमा स्नातकोत्तर गरेकी छिन् र उनी सैन्य परिवारबाट आएकी हुन्। उनले संयुक्त राष्ट्रसंघीय शान्ति मिशनमा पनि कार्य गरिसकेकी छन्।

विंग कमाण्डर व्योमिका सिंह
भारतीय वायु सेनाकी हेलिकप्टर पाइलट विंग कमाण्डर व्योमिका सिंहले पनि मिडिया ब्रिफिङमा अप्रेशन सिंदूरबारे जानकारी दिइन्। उनले २०१९ मा वायुसेनाको फ्लाइङ ब्रान्चमा स्थायी नियुक्ति पाएकी हुन् र २५०० घण्टा भन्दा बढी उडान गरिसकेकी छिन्। उनले कश्मीर र पूर्वी भारतका दुर्गम स्थानहरूमा चेतक र चिता हेलिकप्टर उडाएकी छिन्।

भारतीय रक्षा मन्त्रालयको बयान
भारतीय रक्षा मन्त्रालयले जानकारी दिएको छ कि अप्रेशन सिंदूर अन्तर्गत ६–७ मे २०२५ को रात १ः०५ देखि १ः३० बजेसम्म पाकिस्तान र पीओकेस्थित नौ आतंकी संरचनामा हवाई प्रहार गरिएको हो। यी संरचनाहरूबाट भारतमा आतंकवादी आक्रमण योजनाबद्ध रुपमा कार्यान्वयन गरिएको थियो।

पाकिस्तानी प्रतिक्रिया
पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले भारतको आक्रमणमा २६ जनाको मृत्यु र ४६ घाइते भएको बताएका छन्। पाकिस्तानले भारतका पाँच लडाकु विमान खसालिएको दाबी पनि गरेको छ, जसमा तीन रफाल, एक एसयू–३०, एक मिग–२९ र एक हेरोन ड्रोन समावेश छन्।

जैश–ए–मोहम्मदको भनाइ
कट्टरपन्थी संगठन जैश–ए–मोहम्मदले आक्रमणमा नेता मसूद अजहरका १० जना पारिवारिक सदस्य र चार नजिकका सहयोगी मारिएको दाबी गरेको छ। उनीहरू पाकिस्तानको बहावलपुरस्थित सुभान अल्लाह मस्जिदमा मारिएको बताइएको छ।

भारतीय विदेश सचिव विक्रम मिस्रीको टिप्पणी
विदेश सचिव विक्रम मिस्रीले प्रेस ब्रिफिङमा भारतको कारबाही केन्द्रित, मापदण्डसंगत र उक्साहटबाट मुक्त रहेको बताए। उनले पहलगाम आक्रमण अत्यन्तै बर्बर भएको र त्यसको उद्देश्य जम्मु–कश्मीरको सामान्य अवस्थालाई अवरोध गर्ने रहेको बताएका छन्।

सीमावर्ती क्षेत्रमा गोलाबारी
भारतको आक्रमणपछि पुंछ, राजौरी, मेँढर, उरी लगायत सीमावर्ती क्षेत्रमा भारी गोलाबारी भएको खबर आएको छ। स्थानीय बासिन्दाहरू त्रसित छन् र सुरक्षित स्थान खोज्दै भौतारिरहेका छन्।

पाकिस्तानी प्रधानमन्त्रीको प्रतिक्रिया
पाकिस्तानी प्रधानमन्त्री शहबाज शरीफले भारतको कारबाहीलाई ‘काँतर आक्रमण’ भन्दै त्यसको ‘कडा जवाफ दिइनेछ’ भनेका छन्। उनले पाकिस्तानी जनता र सेना एकजुट रहेको दाबी गरे।

भारतको प्रतिक्रिया
भारतीय सेनाले पाकिस्तानले फेरि एकपटक युद्धविराम सम्झौताको उल्लङ्घन गरेको बताउँदै नियन्त्रण रेखा नजिकको भीमबर गली क्षेत्रमा पाकिस्तानले गोलीबारी गरेको जनाएको छ। सेनाले ‘उचित जवाफ दिँदैछ’ भनेको छ।

प्रत्यक्षदर्शीहरूका भनाइ
मुजफ्फराबादका बासिन्दाहरूले रातिको धमाकाबाट घर हल्लिएको, त्रास फैलिएर सबैजना सुरक्षित स्थानतर्फ भागेको बताएका छन्। उनीहरूले बस्तीमा मिसाइल खस्दा दशौँ मानिस घाइते भएको पनि बताएका छन्। (बीबीसीको रिपोर्टमा आधारित)

प्रकाशित : २४ वैशाख २०८२, बुधबार 19:57