लागूऔषधसहित ६ जना पक्राउ

द नेप्लिज संवाददाता

२२ फागुन २०८१, बिहीबार

विराटनगर– झापा, मोरङ र उदयपुरबाट लागूऔषधसहित ६ जनालाई प्रहरीले पक्राउ गरेको छ । मोरङको मिक्लाजुङ गाउँपालिका ७ का २४ बर्षीय राजन राईलाई इलाका प्रहरी कार्यालय मधुमल्लाबाट खटिएको प्रहरी टोलीले लागूऔषध ट्रामाडोल २०० क्याप्सुल र स्पासरेष्ट १६० ट्याब्लेटसहित उनकै घरबाट पक्राउ गरेको हो भने इलाका प्रहरी कार्यालय पथरीले पथरीशनिश्चरे १ का २० बर्षीय आकाश कँडेललाई ट्रमाडोल र स्पासपेन गरी जम्मा १४० चक्कीसहित पक्राउ गरेको हो ।

यस्तै, झापाको दमक नगरपालिका ६ बाट इलाका प्रहरी कार्यालय दमकले जाँच गर्ने क्रममा प्र–१–०१–००२ह ६६०५ नम्बरको सिटी सफारी चालक सुनसरी हरीनगरा गाउँपालिका घर भई हाल कमल गाउँपालिका ६ मा बस्दै आऐका २६ वर्षीय राम कुमार महतो र सफारीमा सवार दमक १ का १९ वर्षीय बिधान तामाङलाई ट्रामाडोल ७० क्याप्सुल र स्पास्पेन ७० चक्कीसहित नियन्त्रणमा लिएको हो ।

यस्तै, इलाका प्रहरी कार्यालय बेल्टारले चौदण्डीगढी नगरपालिका ६ बाट स्थानीय १९ वर्षीय सन्जिब राई र १८ वर्षीय अनिल राईलाई ट्रामाडोल ८९ क्याप्सुल र स्पास्पेन ८९ ट्याब्लेटसहित पक्राउ गरेको हो । पक्राउ परेका उनीहरुको सम्बन्धमा थप अनुसन्धान भईरहेको प्रदेश प्रहरी कार्यालयले जनाएको छ ।

प्रकाशित : २२ फागुन २०८१, बिहीबार 16:28