पूर्वराजाको भान्जा भन्दै सवा करोड ठग्ने पक्राउ

द नेप्लिज संवाददाता

२७ फागुन २०८१, मङ्गलबार

विराटनगर– आफूलाई पूर्वराजा ज्ञानेन्द्र शाहको भान्जा बताउँदै सवा करोडभन्दा बढी रुपैयाँ ठगेको आरोपमा काठमाडौं–२७ का ५३ वर्षीय अनुप सिंहसहित चार जना बारे जिल्ला प्रहरी परिसरले अनुसन्धान थालेको छ । उनीहरू विरुद्ध कीर्ते र ठगीको कसुरमा अनुसन्धान भइरहेको प्रहरीले जनाएको छ । प्रहरीका अनुसार ६ जनाविरुद्ध पक्राउ पुर्जी जारी भए पनि दुई जना फरार छन् । प्रहरीले सिंहसँगै उनका सवारी चालक ललितपुरका सचिन व्यञ्जनकार, उनका वकिल इलामेली प्रकाश खनाल र कलंकीस्थित दिव्यज्योति कन्सल्टेन्सीका प्रबन्ध निर्देशक राजकुमार केसीलाई पक्राउ गरेको छ ।

ठगीको मुख्य आरोपी अनुप सिंह भएको प्रहरीले जनाएको छ । उनलाई अन्य व्यक्तिहरूले सहयोग गरेको प्रहरीको भनाइ छ । ठगीको रकम वकिलदेखि चालकसम्मको खातामा हाल्न लगाएको प्रहरी अनुसन्धानबाट खुलेको छ । एकै महिलाबाट ९७ लाख रुपैयाँ ठगी गरेको भन्दै सिंहविरुद्ध जाहेरी परेको छ । दाहाल थरकी एक महिलाले दुई छोरी, एक छोरा र आफूसहित चार जना अमेरिका जाने भन्दै सिंहलाई ९७ लाख रुपैयाँ बुझाएको बताउँदै जाहेरी दिएकी छिन् । ती महिलासँग सिंहले आफूलाई नेपाली सेनाको विमान चालक क्याप्टेन बताएको जाहेरीमा उल्लेख छ ।

विमान चालक क्याप्टेन रहेको भन्दै सिंहले आर्मी पोशाकमा खिचाएको तस्बिर समेत देखाएको दाबी महिलाको छ । उच्च पदस्थसँग राम्रो चिनजान भएको भनी विश्वास दिलाएपछि पटकपटक गरी ९७ लाख रुपैयाँ बुझाएको महिलाको भनाइ छ । विश्वास दिलाउन सिंहले नक्कली कागजात बनाउने गरेको समेत खुलेको छ । उनको साथबाट प्रहरीले अमेरिकाको नक्कली भिसा बरामद गरेको छ । दाहाल महिलाकै नाबालक छोराका नाममा सिंहले नक्कली भिसा बनाएको कागजात बरामद भएको प्रहरीले भनेको छ ।

एक अनुसन्धान अधिकृतका अनुसार केहीलाई भने उनले पारस शाहकी छोरीको इन्गेजमेन्ट कार्यक्रम अमेरिका हुने तय भएकाले त्यही समारोहमा लैजाने भन्दै विश्वास दिलाएर ठगी गरेको खुलेको छ । साथै वैदेशिक रोजगार विभागका विभिन्न पत्रहरू, हवाई टिकट र कार्यक्रम रहेको खुल्ने किसिमका कागजात समेत बरामद भएका छन् ।

कसैलाई नेपाली सेनाको क्याप्टेन दर्जामा रहेको विमान चालक बताएका सिंहले केही व्यक्तिलाई भने पूर्वराजा ज्ञानेन्द्र शाहका भान्जा समेत बताउने गरेका थिए । राज खानदान र दूतावासको मान्छेसँग पनि राम्रो सम्बन्ध रहेको भन्दै उनी विश्वास दिलाउँथे । सिंह पटके अभियुक्त रहेको खुलेको छ । उनी पक्राउ परेपछि प्रहरीले सीआरएस (क्रिमिनल रेकर्ड सिस्टम) जाँच गरेको थियो । उनीविरुद्ध यसअघि ६ वटा कसुरमा मुद्दा चलिसकेको खुलेको छ । सीआरएसअनुसार उनीविरुद्ध सुरुमा २०५७ सालमा सार्वजनिक अपराधको कसुरमा मुद्दा चलेको थियो । सार्वजनिक (हाल अभद्र) कसुरबाट अपराधको दुनियाँ छिरेका उनी अहिले नामुद ठगीको सूचीमा छन् ।

२०५७ पछि १ वर्षसम्म उनी कुनै अपराधमा मुछिएका छैनन् । २०७३ सालमा आएपछि भने उनीविरुद्ध जिल्ला प्रहरी परिसर काठमाडौंबाट ठगीको कसुरमा मुद्दा चलेको प्रहरीको सीआरएस रिपोर्टमा देखिन्छ । त्यसपछि २०७७ मा उनीविरुद्ध काठमाडौं प्रहरीमा हातहतियार तथा खरखजाना र ठगीको कसुरमा मुद्दा चलेको थियो । त्यसपछि २०८० मा काठमाडौंबाटै ठगीको मुद्दा चलेको भेटिएको छ । अहिले २०८१ मा ठगीकै कसुरमा ललितपुरमा पक्राउ परेका छन् । पक्राउ परेका सिंह छुट्ने भएमा काठमाडौं परिसरको जिम्मा लगाउन पत्राचार समेत गरिएको छ ।

प्रकाशित : २७ फागुन २०८१, मङ्गलबार 20:37